繼學民思潮佔領新政總絕食反國教後，八方收到風，田北俊都密謀緊下年11月號召20萬人「佔領」門常開。不過田少就唔係想搞絕食，亦唔係要推翻狼英，佢只係想喺狼門之下講飲講食。其實田少噚日以旅發局主席身份話，今屆美酒佳餚巡禮係最後一次喺西九海濱長廊搞，佢同政府傾緊下屆移師政府總部對開空地開餐：「嗰度近蘭桂坊、灣仔食肆。」
比西九大近半公頃
空地喺政府總部行去海邊位置，家俾圍板圍住，佔地有4公頃，比起西九3.6公頃仲要大。今屆美酒佳餚巡禮喺11月1至4日舉行，除咗有208個美酒同103個美食攤位、專賣900蚊以上靚酒嘅專尚名酒區，仲新增咗「甜品天地」，有中西甜品同美酒，有專業品酒師講解配搭竅門，入場要畀20蚊，但可換番張20蚊現金券。「飛天釀酒師」創辦人麥得華噚日話，朱古力、咖啡味重甜品可配葡萄牙Port酒，充淡苦味；cheese cake就配酸度高嘅白酒，中和油膩感，而且要滑先可以配合cheese cake嘅口感。「壽包、月餅都可以配白酒㗎」。佢教路，月餅既甜但又有蛋黃鹹味，可配Muscat、Sauternes兩款甜酒，前者粉紅色而帶花香味，後者甜得有層次感。甜酒多啲女仔鍾意，佢講笑話，「所以男士先要學嚟追女仔」。不過，田少似乎唔多like，忍唔住講咗句真心話，「其實我唔太鍾意食甜品」。除特定專區，大會入場免費。詳情可睇睇 http://www.DiscoverHongKong.com/WineDineFestival/tc。mailto:[email protected]