全球銀行市值十大，內地四大銀行都有份，但做國有銀行賓架，點講都算為人民服務，所以薪酬水平絕對唔可以同本港或海外市場比較，之不過一經出口外銷，身價就不再同日而語。
年薪244萬人仔
好似先後出任過中行同人行副行長嘅國際貨幣基金組織（IMF）副總裁嘅朱民，根據IMF年報披露，截至去年7月底計，佢年薪38.75萬美金，折合244萬人仔。
睇番佢曾經做過嘅舊舖中行，去年年報所載，行長李禮輝酬金連社會保險兼住房公積金，稅前合計年薪都只係97萬人仔，其他副行長級，就介乎90萬至94萬人仔。
現年58歲嘅朱民，曾獲美國霍普金斯大學經濟學博士，番文流利，去年5月，IMF前總裁卡恩提名佢老哥做首位中國籍副總裁，雖然卡恩後來受性醜聞影響而落台，但接任總裁嘅拉加德，仍按原計劃喺7月正式提名朱民，拉加德去年年薪就係46.79萬美元。