近日黃子華開棟篤笑，當中有一句好有道理：「做人冇公關，食得屎㗎啦！」睇嚟湖人中鋒懷特侯活，深明呢一句嘅箇中奧妙。紫金軍團周日季前賽，對住勇士雖然輸波，不過有「超人」喺場邊搞氣氛，就算輸83:110咁甘都冇所謂啦！
現年26歲嘅懷特侯活，賽前有出席練波，仲喺半場將個波掟咗入籃；但係到比賽嗰時，佢就着番老西，打條煲呔加副眼鏡喺場邊睇波。咁究竟背傷好未呢？佢冇講到明，只係話康復進度良好：「康復進度良好，不過我目標唔係打季前賽，而係贏總冠軍囉，所以我要肯定自己100%健康。」我求大俠都知你目標係咩，不過你成日都唔講清楚家咩狀況，大家好難捉摸到你㗎喎。
就連湖人教練米克布朗，都唔知「超人」幾時先可以上陣。米克布朗發晒晦氣：「我唔知佢幾時好番，淨係知睇佢練波好ok。即係點？冇乜點嘅，但係佢練波真係冇問題。」唔通米克布朗係鬧緊「超人」hea爆，唔願打季前賽？定係班隊醫做唔到嘢呢？只有佢同個天先知啦。
湖人季前賽大敗
可能知自己咁做有啲唔着，懷特侯活喺比賽嗰時，喺場邊勁搞氣氛做補償。比賽期間，佢見今仗得10分進賬嘅球隊大佬拜恩，得到罰球機會，即刻帶頭大嗌MVP，全場即時跟住嗌！雖然湖人頭兩節都控制住戰局，但係俾勇士喺第3節打咗段28:0嘅瘋狂攻勢，所以先被大炒27分。
雖然「超人「上陣成謎，不過我求大俠肯定球迷已經餓波餓到不行了，唔緊要，周二灰熊作客對公牛當頂住癮先啦。（now678台明日8:00am直播）