又打算加價嘅中電（002）噚日宣佈委任希慎（014）主席利蘊蓮（Irene）做獨立非執董，同時做埋審核委員會、財務及一般事務委員會委員，一年袍金90.5萬，多過佢舊年喺希慎做非執董嘅31.8萬人工。
中電加費唔影響希慎
中電搵Irene做獨董，其實都幾啱數，希慎係銅鑼灣大業主，淨係幫襯電能實業（006），表面上同中電冇轇轕，即使中電計劃調整電費對佢同希慎冇乜影響，夠晒獨立性。記得希慎前主席兼行政總裁利定昌09年底突然去世，公司主席由鍾逸傑出任，Irene舊年先從澳洲番嚟香港，接任希慎非執行主席，今年初轉做執行主席。但佢身兼國泰航空（293）獨立非執董、一間澳洲上市公司非執董同埋一間新加坡上市公司獨立非執董，計埋中電，要做五間上市公司嘅董事，睇文件同開會都要認真度好時間先得。