推土機轟隆轟隆地響，清拆圍村的畫面不時在莊景明的腦海劃過。他在黃大仙衙前圍村土生土長，一家人落地生根50年，如今家園面臨清拆，難捨難離。這一朝天未光，莊景明已無心睡眠，一早起床打點準備，與其他「冇得留低」的村民到政府總部打保衞戰。
衙前圍村的祖先為吳氏、陳氏和李氏三姓客家人，49歲的莊景明屬外姓居民。他的父親早於40年代末從汕頭來港，他鄉遇故知，經朋友介紹在衙前圍村負責打更工作。其後母親亦在50年代初帶同胞兄和姊姊來港，莊景明在圍村出世，於八兄弟姊妹中排行第七；一家十口在圍村定居下來，一住就半個世紀。
走入衙前圍村村口的「慶有餘」石匾，經過窄巷，來到莊景明的小村屋。眼見牆身鐵皮剝落、石灰破損、屋頂補過英泥，怎住得人？「間屋係當年屋企人自己起，你唔好理我間屋舊又好，殘又好，總之就係屋企。」莊景明住開有感情，不要政府不合理強拆。
提夜香也開心
莊景明眷戀圍村生活，絕對是上樓無得比。「細細個喺圍村大，當年無乜嘢玩，成班細路就玩彈波子、掟毫子，打波子打落坑渠又執返上嚟再玩過，都唔知幾過癮；又可以四圍走捉迷藏。」他笑言在圍村過節尤其熱鬧，「最鍾意就係新年，燒炮仗唔識驚；天后誕有神功戲、中秋節又會整燈籠，煲蠟煲到啲火幾層樓高㗎！」
說來略帶誇張，但圍村生活就是與別不同。莊景明還說：「知唔知乜嘢係夜香？我就係坐痰罐大，讀中學時都仲有人倒夜香，每晚12點就有人收夜香。」時移世易，社會發展，其後政府在圍村側加建公廁，倒夜香服務也從此絕迹。
舊日令人懷緬，衙前圍村是本港市區僅餘的圍村，該村三姓祖先早於南宋時期遷至闢村定居，可知年代久遠。村內全盛期有逾百戶，現時包括莊景明，僅餘下10多戶不肯搬走。莊景明的家人或入住公屋或租樓，亦早已離開圍村，但告別圍村難免不捨。
「媽媽90幾歲，早已上咗樓，但前幾年開始思路唔好，有一晚突然執咗兩袋嘢話要返圍村住，保護圍村喎。」事件令莊景明印象最深，也最感欷歔。他明白市區發展，清拆圍村在所難免，但希望政府作合理賠償，令村民得以安居樂業。
記者：黎國剛