強國嘅山寨產品一向冇品質保證，噚日網上流傳一批強國同胞團購嘅卡通蛋糕，據講每個原價180蚊人仔，團購價只係58蚊，唔少同胞貪平中伏。
其中最驚嚇係多啦A夢，似足一條凸眼死魚，網友話係生化版叮噹，相信冇人敢擺入口。另一個趴地熊就變成樣衰「賤熊」，投訴完再送，變咗走樣中國熊貓。而Hello Kitty竟然係矇豬眼pizza面，另一隻可愛熊就做咗陰公豬，爆笑程度滿分。
據講蛋糕製造商話「所有款式均按圖製作，但只保證百分之九十以上相似率」，而每個師傅有唔同風格，實有啲唔一樣。但呢批蛋糕明顯係走樣程度高達九成，基本上同原圖無關係囉，唯一作用係嚇喊細路。
