最慘：馬略卡
馬略卡周日失了球有點冤枉的12碼，最後以1:2不敵CF格蘭納達，今季主場不敗金身被打破。在65分鐘，格蘭納達的加比爾托治單刀，馬軍的尼素爾（紅衫）從後緊纏；前者跑到禁區入面跌倒，球證判罰12碼，兼罰尼素爾紅牌，但二人其實沒有太多身體接觸。格軍的艾亞比操刀射入，先開紀錄，最終贏波而回。
最跌watt：多蒙特
猶記得上周中歐聯，多蒙特表現出色，差點擊敗曼城，但回到德甲聯賽就大跌watt。多蒙特周日作客漢諾威，靠羅拔利雲度夫斯基打開紀錄，但在86分鐘被馬美迪奧夫追成平手，最後以1:1完場。包括今場，多蒙特今季聯賽作客未贏過，4戰3和1負。
最痛：祖爾賓納迪（阿士東維拉）
周日熱刺主場對維拉的比賽中，後備上陣的維拉後衞祖爾賓納迪在80分鐘被加里夫巴利的鞋釘傷，小腿留下一條很深的傷痕（圖），要立即送院治理；情況如同朗尼之前大腿受傷一樣。由於維拉當時用光換人名額，所以尾段焗住要踢少個。
最老而彌堅：派路（祖雲達斯）
雖然派路（右）已經33歲，但罰球功夫還未退步，在周日作客錫耶納的意甲，他在14分鐘射入一記急勁的割草式罰球，為祖雲達斯先開紀錄。雖然錫耶納及後追平，但另一名中場馬治斯奧在完場前奠定勝局，祖記最終以2:1險勝對手。
網友討論區
《利物浦最唔爭氣》四川姑爺：「若要生活好，咪掂利物浦，真係金句中金句！」dhj：「史篤城既係細球王又係盤王，利記都有咁上吓強，但都對抗唔到佢哋對家嘅旺氣。」《曼聯唔出兩老即掂》ricotsang：「唯一解釋就係幫佢哋（傑斯及史高斯）破紀錄，有時出一個就夠啦，出晒兩個都唔知做咩。」kelmancchan：「老實一點，今場沒有兩老，又沒有兩翼，中場的組織真的十分流暢。」《國家打吡和波好合理》23號仔：「大家夠氣夠力嗰時，完全見唔到巴塞可以造波搓入禁區，係後期皇馬體力下降，先有空位畀到巴塞。」leoleung12：「講後防，巴塞咁嘅殘陣都和到，真係收晒貨。」資料來源：香港討論區