今日議題多，入題。首先，幾個月前孫柏文高調話重手買熊證。嗰陣仲係日日話西班牙政府將會爆煲，冇人救啲西班牙銀行，然後拖垮全球銀行體制，引發雷曼2.0。
結果？喺上個禮拜五，恒指升穿21000點時，我隻熊證打靶。我嘅好多另類fan屎講過，我買嘅熊證仙遊之時，也是股市沽得的一刻。睇尋日恒指走勢，我呢啲fan屎so far啱咗一日。
花旗總統選舉成關鍵
不過，因為今次升市全靠《量化寬鬆3之無限期咁印》，聯儲局成唯一主宰市場嘅因素，咁即係花旗國總統選舉係關鍵。原因係共和黨候選人羅姆尼已經講過，贏咗就唔會畀伯南克連任。
我覺得邊個贏，聯儲局都係會印，不過如果羅姆尼勢頭越來越靚時，市場價格就會開始反映印鈔魔伯南克下台嘅機會。
一路以來，睇intrade等博彩網站賠率，奧巴馬遙遙領先。不過上周首場總統選舉電視辯論，羅姆尼完全擊敗奧巴馬，更能解釋畀花旗國選民知點解選佢會好啲。
睇民調，仲係叮噹馬頭。不過警告各伯南克fan屎，根據當今世上，我至尊敬嘅政治化妝師Dick Morris，佢話民調機構係會調節攞返嚟嘅數據。會根據年齡、種族等調高或調低某類人嘅投票率，去反映聽電話答民調同真係去投票嘅機會率之分別。
民調機構都會依賴對上一次，即08年每種選民類別嘅投票率去調節。問題係08年忽然多咗黑人幫「架己冷」投票，又好多後生仔女誤信Hope、Change、Yes, We Can！佢哋兩批人如果重返04年或之前嘅投票率，奧巴馬輸硬。賭繼續有QE帶來升市？睇實花旗總統選舉。
孫柏文
獨立股評人
http://facebook.com/shuen
本欄逢周二刊出