咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
牛腩篇
有時唔係贏波先值得稱讚。利物浦周日主場慘被史篤城悶和0:0，今季聯賽主場仲未開齋；一般領隊越面對壓力，就越傾向保守，不過紅軍領隊羅渣士繼續貫徹佢重用新秀嘅風格，一對90後翼鋒史達寧同蘇索都交到貨。其實眨吓眼已經2012年，叫得90後已經未算後生得好交關，不過史達寧只得17歲，蘇索只得18歲，就真係牛奶嘴得好緊要。英格蘭籍嘅史達寧，有啲艾朗連儂影子，都係細細粒粒，個人突破力強，好處係左腳唔算差，安排佢打左右翼鋒都OK；蘇索就傾向盤扭型，睇佢左腳推波嘅風格，都有受美斯影響，或者同佢生於西班牙及出身西班牙球會有關，當然以佢嘅身材，要喺英超立足，仲要增加番對抗性。不過，紅軍要仿效巴塞嘅4-3-3，有一對好翼都未夠；始終蘇亞雷斯呢位正前鋒，角色與踢法都唔夾。謝拉特之前同佢伸冤，講球證偏見先認為蘇亞雷斯成日插水；不過以小弟所見，阿蘇對史篤城全場不下7、8次誇張博同情的倒地動作，包括好肉酸咁喺禁區內四腳爬爬，邊個都睇得出佢插水。而阿蘇屬純射手類型，兩邊傳中或者畀個直線佢單刀，係幾有把握；但要就隊友配合，打吓小組入楔，就真係格格不入。睇番紅軍陣容，安祖卡路爾借走，波連尼低潮，又真係得阿蘇係識入波嘅前鋒；羅渣士家首要，就係將阿蘇融入進攻體系。