近年氣勢超強的《FIFA13》，已經成為首選必玩足球Game，我哋搵嚟港甲球隊「太陽飛馬」的四位年輕球員試玩，分享一吓《FIFA》經。踢慣波，Sense係好啲，玩過幾Ground後，佢哋已經發現「大隻」係今集關鍵，「屈速」已成絕響。佢哋更分享在海外比賽後，與隊友們八人混戰《FIFA》嘅往事，認真瘋狂。 記者：韓繼聰 攝影：譚盈傑
鞠盈智
位置：中場
愛用球隊：祖雲達斯
最愛球員：派路（祖雲達斯）
顏樂楓
位置：中場
愛用球隊：皇家馬德里
最愛球員：C.朗拿度（皇家馬德里）
陳柏衡
位置：中場
愛用球隊：拿玻里
最愛球員：加利夫巴里（熱刺）
李毅凱
位置：中場
愛用球隊：巴塞隆拿
最愛球員：恩尼斯達（巴塞隆拿）
物理引擎升呢
《FIFA》近年越嚟越受機迷歡迎，原因總離不開一個「真」字，就連飛馬一班球員都一樣鍾情於佢，「《FIFA》資料夠齊備，球隊球員全部以真名示人，玩起嚟特別投入！」鞠盈智邊玩邊講。但更要讚嘅係《FIFA13》的動作及反應，在《FIFA12》首次加入嘅新物理引擎，今集做得更仔細。試玩咁耐都唔覺有上集的「斷腳」及「凌空跳」等怪異場面；相反球員的動作反應嚟得更像真，「上集有速度就已經好易屈，今集嘅能力明顯比較平衡，除速度外，身形更重要，碰撞的反應更真，同現實踢波更相似。」顏樂楓更笑說要試吓用大隻仔如泰利試打前鋒，睇吓會唔會有意外收穫。另外，今集無論進攻定防守，都可以利用上半身動作去推撞，當然撞得太狠會犯規啦！
控波易甩腳
講到屈機，上集愛用速度球員嘅李毅凱立即發聲：「除咗身形問題，接波推波停波都更容易甩波，雖然無得屈，但感覺真係更真，係好玩啲嘅。」今集的「First Touch」設計，會計算埋四周環境位置及能力，唔會咁容易吓吓黐到波，你估個個都係球王咩！
另外，上集嘅AI亦係Game迷投訴嘅重點，自己球員太蠢唔識走位之餘，電腦又太勁，玩到無癮。陳柏衡就話：「今集AI隊友更識按戰術走位，戰術效果更明顯，特別係對實力相若的球隊，戰術就更重要。」睇佢哋玩，前鋒們嘅感覺又的確係有Sense咗，直線波亦更有殺傷力。難度方面，亦有更平衡的調整，唔會有太過難玩的情況出現。
打機添默契 八人海外戰超興奮
問一班飛馬球員打《FIFA》嘅經驗，原來佢哋都係由《FIFA09》開始玩，平日鍾意同成班隊友一齊混戰，「打機時一樣可以了解其他隊友嘅思想同踢法，對加強默契有幫助！」四人異口同聲齊齊講。講到混戰，一次海外「比賽」最難忘，話說有次出外比賽，有隊友竟然帶埋遊戲機，於是大玩八人戰，「咁齊人玩真係特別過癮，我哋入波好似真實入波咁慶祝，輸咗又有大懲罰，玩到癲晒！」四人興奮地邊玩邊講，年少多好！
