阿爺國慶都唔救市，股民又再失望，A股回復跌勢，昨魏力建議由「本地薑」換馬中資股，似乎早了一點，但推介的鞍鋼（347）僅微跌3格，跑贏H股指數，低位承接力不俗，可繼續留意。蘋果散戶指數一向對大市走向有啟示，上周散戶指標由5.9飆升至22，顯示散戶突然一面倒睇好，加上A股不振，恒指21000點熊證上周五亦已打靶，再升動力成疑，小心後市來個大震倉，有貨的戰友宜減低整體持倉，20日線（20541）為島形頂底部，屬重要支持位，不容有失。既然中資股尚欠東風，短炒惟有鎖定最強的本地地產股，當中甚低調的資本策略（497）今年密密有盤開售，盈利大躍進，已靜雞雞升至一年高位，但PE兩倍唔到，息率近7厘，與香港興業（480）一樣，屬滄海遺珠地產商，不妨小注冷吼！近年資策積極買地，豪宅盤陸續有來，跑馬地藍塘道The Hampton去年賣8伙，已套現約8億銀，仲有最後一伙未賣，估計可套現近億元。另外，早前購入渣甸山白建時道松園，擬重建為「渣甸山OPUS」，可建樓面達7.5萬平方呎，勢將帶來巨額利潤。集團去年買入白加道及銅鑼灣地皮，今年6月再買九肚山地，可謂財源滾滾來。魏力 http://www.facebook.com/2012jason