走入美容院，放低十幾萬連幾両血，畀一個非醫療機構處理，唔知打啲乜嘢入身體。證明女人為靚，勇氣澎湃。希望4名去DR集團打針感染惡菌嘅病人早日康復。美容院銷售問題多，只要成功你入局，自然有方法令你千金散盡，手法一不離二，先低價甚至免費畀你試做Facial，順理成章叫你買A會籍。用過套票幾次，成功建立信任，就叫你轉較貴的B會籍。嫌貴？再落嘴頭「趁後生使多少少錢，唔係老時想救都救唔到」、「除番開，一個月買少一件衫，都喺度啦。」到你用過B會籍，美容院姐姐會以親切笑容同你講「唔可以每次都做呢個Treatment，要連埋其他一齊做先有效。」此時此刻，情況有如供股，一係蝕入肉，一係焗上轎。上述手法，乃菲菲親戚於上市美容集團之真人真事。有冇靚咗都係其次，最慘就谷到一肚氣。好多時女人面對車輪式銷售唔識拒絕，最後乖乖奉上信用卡。其實要對付死纏嘅銷售員，方法好簡單，默默流淚扮可憐，萬試萬靈。Fifi本欄逢周二、四刊出