立法會周三開鑼，財經界兩位新丁議員：金融服務界張華峰同會計界梁繼昌已經諗好一堆議題，要財經事務及庫務局跟進，局長陳家強將會好唔得閒。
張華峰同梁繼昌兩位新丁，相當積極，好想喺立法會有一番作為，兩位當選冇耐已經各自約咗陳家強局長食飯講數，講定畀局長知，佢哋入咗立法會打算為業界爭取啲乜嘢。
張華峰三個堅持
主要代表本地中小經紀行利益嘅張華峰要求三件事：還原第一階段港股加時，即要番個半鐘頭食晏時間，其次係設立佣金兩級制，第三係搞清楚期貨晚市嘅遊戲規則。
聽講，陳局長對於頭兩件事，已經隱悔地表明好難做。之不過，當日CY應承金融界選委會跟進呢兩單嘢，先取得呢個界別大部份選委支持，加上張華峰想有作為，一定會同局長爭取到底。
至於會計界梁繼昌，佢打算攞番立法會收爐前通過嘅《公司條例草案》出嚟，就住會計師須負刑責單嘢，要求再收窄孭飛人範圍，另外就係關注審計監管改革。總之，呢兩位新丁都係諗住做嘢，陳局長想hea都難。