海難事故發生一周，除咗一幕幕令人傷心嘅畫面外，仲有令港人憂心嘅一幕，就係事發當晚堂堂特首梁振英好似新聞官咁，傍實中聯辦副主任李剛去醫院探望傷者，令人質疑香港真正權力核心喺西環而非添馬艦，就連《華爾街日報》網上版都有報道此事（圖）。呢一幕俾網民改圖瘋傳，其中一款係「慈禧」李剛與「小狼子」，圖片加上一句——「梁振英：我爸是李剛﹗」改圖之啜核抵死，連《華爾街日報》都借用嚟分析中央在港影響力、大量內地人湧港所引起嘅中港矛盾。報道仲提到梁振英喺爭選特首時已有「狼」嘅外號，一直被批評同北京行得太埋，係北京操控選舉過程先做到特首喎。