華華上個禮拜喺天津一間酒店嘅中菜廳碰見大廚談錫麟，佢之前係灣仔萬麗海景滿福樓嘅行政總廚，隸屬新世界發展（017），寒暄一輪自然講到創辦人彤叔，大家都擔心佢留院情況，再講到彤叔最鍾意食乜。
唔愛山珍愛青菜
早有聽聞，彤叔平日飲食好清淡，喺新世界大廈總部設有私家飯堂，多數叫人蒸條魚、燙碟青菜，普普通通就一餐。談師傅話，彤叔去到滿福樓，亦鍾意叫家常小菜，例如勝瓜炒牛肉、凉瓜排骨、腐乳炒通菜咁。
唔好以為有錢人一定餐餐山珍海錯，大魚大肉，呢啲場面可能喺老土到爆嘅電視劇先見到。家陣人人講健康飲食習慣，食得越清淡、越簡單越好，有錢人就更加重視。何況，世界上最好味嘅食物，咪就係阿媽煮嘅家常便飯囉。