發展局局長波叔繼「劏房波」之後，再憑實戰經驗被封「酒駕波」，但只要有狼英袒護，佢懶理全城罵爆都可以繼續做局長，可見狼班子成員真幸福。
既然波叔趕都唔走，又話要貢獻社會，爽仔提議佢不妨做新一代交通安全大使，親身出鏡翻拍兩條宣傳片，話晒近年好多奸角都爆紅，可能波叔可以一鋪翻身喎。
網民讚技術勁過拓海
第一條片係「醉酒駕駛篇」，原裝男主角無論喺酒吧抑或飲宴場面都盡情豪飲，人哋勸佢：「你躭車呀，唔好飲啦。」佢就答：「怕乜喎，飲啦！飲少少啫，得啦，有分數啦！」就算躭車亂舞，嚇到同車女友臉青青，佢都懶得戚咁講：「定啲喎。」結果梗係撞車收場，認真害人害己。
短片嘅情境係咪似曾相識呢？睇返波叔飲完酒之後開車載太太返歸，沿途曾經越過雙白線，又切去逆線爬頭，開車開到似舞龍咁款，事後依然死拗話有信心符合法例，冇醉駕，好明顯係男主角上身啦。
另一條片輪到「危險駕駛篇」，旨在宣傳「路上零意外，香港人人愛」。原裝短片由梁粉歌手李克勤做主角，呼籲司機做個精明駕駛者，保持安全車速，唔好跟車太貼同酒後駕駛。
波叔係酒後開車嘅熟手技工，網民話佢啲駕駛技術直頭勁過《頭文字D》嘅拓海，表演跟車太貼相信冇難度，加上身為政府高官，應該免費做代言人，幫政府慳返啲請茄喱啡嘅公帑。
吳爽