睇奧運，主角當然是運動員，3個倫奧主持人卻因言行出位，忽然彈出，頓成網上討論區的箭靶。被批評體育知識缺乏、現場提問騎呢，還有評述用辭九唔答八。即使插到體無完膚，年資近30載的韓毓霞、80後的李思雅及蔡曉慧，均約定4年後再闖巴西里約熱內盧，繼續感受奧運的好風光。
記者：林湛穎
攝影：王子俊
韓毓霞 緊守崗位28年
1979年初夏，有個女生考完會考，在男同學慫恿下，報名參加「香港小姐」競選，結果鄭文雅加冕后冠，她和另一位參賽者鍾楚紅名落孫山。33年後的今日，鄭鍾二人早已上岸，那個女生也再不是青春少艾，兩個月前第6次採訪奧運，可能是香港現役傳媒人中最多的一位，她就是韓毓霞（Wendy）。
「我做戲唔叻，有次戲劇組想我扮精神病人。我同佢哋講，演唔到咁複雜嘅角色，推咗。」電視圈總有一類人，他們不會大紅大紫，當上視帝視后的機會近乎零，但他們總在觀眾心中佔一席位。兒童節目首推譚玉瑛，同樣，幾乎每個港人都看過的《體育世界》就有Wendy。
28年來緊守體育主持崗位，每隔4年，Wendy的人氣連同出鏡次數急升，平日愛睇3線劇的牛頭角順嫂和土瓜灣賣魚勝，都會份外留意奧運新聞。由92年巴塞隆拿開始，每逢奧運年，只要打開免費電視，總會見到Wendy親身穿梭賽場採訪。回顧今屆，香討、高登網民會嫌她問題問得空泛無聊，她回應得淡定老練：「我對自己嘅要求都好嚴，建設性意見會聽，但過份人身攻擊唔會影響到我。」
倫奧如缺憾美
88年漢城奧運，Wendy第一次參與奧運，她留守在廣播道總台錄影廠內擔任主持，拍檔汪明荃、何守信等全是老前輩，之後連續6屆都擔大旗，進駐「戰場」直擊，喜怒哀樂盡入眼簾。今屆有線電視原本全程獨家，直至開賽前不足1小時，免費電視台確定加入戰團；正在拍劇的Wendy臨時接到通知，數天後已身處英倫，這一個月探訪，她的確嫌自己不夠好，「出發前拍咗一場喊戲，冇N.G.，連排練同正常拍攝，我喊足一個鐘。去到英國，把聲沙晒，以為食完藥會好啲，點知連眼都腫埋，成個禮拜先好番。」
倫奧經歷，對她來說是一種缺憾美。「個個都以為女子伊仙芭耶娃會衞冕女子撐竿跳，結果只得銅牌，好多人以為佢會好唔開心，唔知道佢賽前壓力好大，搞到有情緒病，我訪問佢嗰陣，佢好感恩講：『幾個月之前，我都唔知可唔可以參賽。』，奧運唔止係攞金牌咁表面，仲有更深層意義。」
李思雅 面對批評做駝鳥
蠅量級讀作「繩」量級、與潘宗明鬥爆無聊對白……，多得奧運有免費直播，今屆留港評述的李思雅（Cindy）成為香討、高登的紅人，巴打們不留情面發炮狂轟，更封為「呻吟主持」，因要主持奧運而每晚只瞓幾小時的Cindy還收到信，真是嚇餐死。
7月初拍罷電視劇《法網狙擊》，Cindy原本到台北叉電幾日，結果因倫奧取消夏日假期，換轉成錄影廠內同4個男人（鍾志光、潘宗明、鍾伯光、鄭景亮）輪流拍檔旁述，晚晚只瞓4、5小時。她說：「奧運期間唔敢上討論區，朋友見到留言，都有發短訊畀我，我驚會影響心情，最後都冇睇。」
扑咪日子有苦自知
不斷被網民狂插，Cindy以一招駝鳥政策，謝絕觀看討論區，為免影響工作情緒。不過，「麻煩事」終於找上門，有日被監製召見，眾人心想應一次嚴肅的「照肺」，她說：「監製遞咗封信畀我，原來喺觀眾來信，話覺得我做得唔錯，喜出望外。」Cindy在05年選完港姐，即當上《體育世界》主持，3年後的京奧被派駐京城直擊，當體育工作者的夢想，於23歲便實現了。
因時差關係，今屆比賽大多在香港時間深夜上演，但反而引起更多網民討論，網上盡是對主持人不留餘地的評價，精采程度足以媲美賽場，「做大賽主持就預咗有人批評，我覺得今屆比上屆好。」
體育主持是不少人的dream job，保特、孫楊等大明星都成為「扑咪」對象，看似很容易很風光，正因如此，往往都是「惹火」尤物，「運動員輸咗，再難受都好，為咗直播都要『拉住』佢哋問。」這一刻的Cindy期待4年後，再上戰場。
蔡曉慧 難忘採訪初體驗
悉尼、雅典、北京，對上3屆奧運，蔡曉慧（Sherry）都以運動員身份出戰，被傳媒包圍訪問已是司空見慣。今屆角色大轉變，首次以傳媒人西征倫敦奧運，感覺猶如大鄉里入大都會。
「一日跑4、5單，體能要求仲勁過做運動員。」過去3屆，她的活動空間局限於泳館和選手村，出入賽場有專車接送，亦不愁膳食選擇。今屆她身兼兩職，為無綫和香港電台做採訪，穿梭倫敦半個月，早睡早起是當運動員的基本要求；角色一職，早出晚歸則視之為平常事，慶幸今次沒出現蝦碌，還有幸採訪陳一冰奪男團金牌，遺憾的是沒有時間重返游泳館，為幾位師妹打氣，「可能自己喺運動員出身，佢哋會將真實嘅一面展示出嚟。有時運動員就係咁，訪問時一個樣，完咗之後又變一個樣。」
爭位追星開眼界
Sherry不是奧運新鮮人，但倫奧這一役讓她眼界大開，她不敢給自己的表現打分，但今後也不會輕易對主持和藝員下評價，「要同其他記者爭位做採訪，變得好粗魯，以前唔會明白。」在奧運，面對的不僅是運動員，還要學懂爭分奪秒，跟全球各支採訪隊在採訪區鬥快霸位，爭取第一時間「訪星」。「家跳出comfort zone，原來等幾個鐘，只為咗同運動員做兩、三分鐘訪問，以前做觀眾根本唔會明白，做（採訪）奧運等同打仗。」
這幕大鄉里出城記順利閉幕，談不上完美，從中亦有一些得着，「有次去採訪體操，嗰運動員走到我前面，點知嗰職員一手將佢拉走；事後諗番，如果盡咗力，對其他人嘅冷言冷語，就唔需要過份上心。」4年後的巴西，觀眾應會看到一個更成熟的Sherry，出現在螢光幕前。
《體育世界》3主持簡介
韓毓霞
79年選港姐，三甲不入。84年中大畢業後，循無綫電視司儀訓練班入行，翌年加入《體育世界》做主持至今，先後6次採訪夏季奧運會，體育主持形象深入民心。
李思雅
前香港網球代表，05年參選港姐入行，除主持《體育世界》外，亦參演多部電視劇，包括《天與地》、《珠光寶氣》等。08年北京是人生首次出訪奧運，今屆則留守香港擔任旁述。
蔡曉慧
前香港女飛魚，曾三度出戰奧運，09年底退役後轉型，現身兼多職包括游泳教練、電台主持、報章專欄作家和《體育世界》主持，今屆首次以港台主持身份採訪奧運。
