異動空間:鞍鋼四折大平賣 - 魏力

異動空間:鞍鋼四折大平賣 - 魏力

伯南克8月尾放風推QE3後,港股連漲5周,由萬九點炒上二萬一,創5個月新高。另外,港人盲搶樓,地產股升到癲,連大折讓股都炒爆,去到呢個地步,魏力建議趁市場亢奮時,及早由「本地薑」換馬中資股,聚焦下月十八大後的政策受惠股。
今年H指大幅跑輸恒指,趁市場氣氛改善、魚缸夠水之際,追落後中伏機會細好多。水泥及基建股最早開車,之後係電訊設備股,近幾日紙股、玻璃及航運股都起錨。剩返乜嘢最落後?就係各類基建、鐵路、起樓都要用的鋼鐵!
冇錯,連牛頭角順嫂都知經濟唔好,鋼鐵業產能過剩,鋼價暴跌,好多鋼企頂唔順要執笠。不過,社科院調查顯示,第二季中國經濟已見底,加上中央連續減息,十八大後料將加快谷基建鐵路投資,鋼鐵需求復蘇可期!9月內地鋼鐵業PMI顯著回升至43.5%,鋼材銷量亦較8月反彈近8%。再者,鋼市亦逐步「去庫存化」,庫存指數回落至50%以下,顯示供求趨於平衡。
業務見曙光之餘,估值更係平到笑,鞍鋼股份(347)現價(4.24元),PB只係0.46倍,較8、9月高位仍低一成,大有條件追落後,短炒睇8月高位4.67元,中線目標係翻半番!

魏力
http://www.facebook.com/2012jason