民建聯楊祥利早前因為破產而喪失區議員嘅資格，所屬嘅鞍泰選區下月4日進行補選。今次補選爭崩頭，5個人爭一個位，焦點落在由民主黨出走成員組成嘅新民主同盟，可唔可以砌低「舊相好」，事關新民主同盟已派出陳珮明，火併民主黨女將游月華。兩邊陣營不容有失，噚日齊齊搵來星級人馬助選，新民主同盟派出最大殺傷力武器鄭家富上陣，陪住陳珮明喺區內巡遊；民主黨兩巨頭何俊仁同劉慧卿雙雙殺入沙田，為游月華企街站收市民簽名。一個選區有幾大吖，兩幫人馬終於有幸喺街頭相遇，游月華同陳珮明仲先禮後兵握晒手；唔知到11月4日決戰日，大家仲會唔會咁客氣？