14歲入娛樂圈、曾被譽為90年代最可愛女孩的葉蘊儀（Gloria），隨歲月流逝變成小婦人，獨力養大一對子女。退出娛樂圈，Gloria尋回方向、尋回自己，努力進修追回最基本的學識修養，做個好榜樣，明白身教才是子女的最佳教材。 撰文：羅美倫
現年39歲的葉蘊儀，86年14歲時被星探發掘拍廣告，88年與著名日本演員拍《孔雀王子》演阿修羅深受港台日韓觀眾歡迎，89年中學畢業全身投入娛樂圈，曾被譽為90年代最可愛的女孩，今日的Gloria早已放低名利，在尖沙嘴開設香港黏土藝術學院（Art Around），做自己喜歡做的事。
進修博士課程
Gloria95年閃婚後生下一對子女，可惜2000年離婚收場，Gloria曾打工但還是覺得應多讀書，她說：「好細個就做嘢，畢業後拍電影，我鍾意藝術，應該深入啲了解藝術，06年開始喺香港嘅大學進修，最鍾意藝術史，主修陶瓷。」今年已是博士課程最後一年，大半年後的畢業禮一對17及14歲子女都會出席觀禮，畢業後Gloria會認真策劃，將自己對藝術的興趣化成事業，希望三年內開作品展。
欣賞自己身體
對於子女的管教，Gloria認為身教最重要：「除照顧佢哋，我自己都要做功課、做作品、睇書、寫論文，要做個榜樣畀啲細路睇。」獨力養小朋友辛苦嗎？她說：「佢爸爸會畀錢嘛。」可有拍拖？她直言：「冇！唔得閒呀，我醉心藝術，又冇乜見到啱嘅。」那子女知她昔日的威水史嗎？Gloria說：「我從來唔講，佢哋從同學方面知，我想畀佢哋覺得做藝人係好普通嘅職業，唔想影響佢哋，由佢哋自由發展自己嘅興趣同事業。」
昔日的可愛女孩變成兩孩之母，不但身份，外形亦有變，對於退出後經常被傳媒形容為師奶，Gloria不慍不火，另有看法：「因為人哋仲覺得我停留喺嗰個階段，我確係阿媽嘛，對我嚟講內在最重要，我又唔係拍戲，唔需要特別喼弗，如果我仲收緊你錢你可以咁批評我，我只係普通人，你咁批評我係唔尊重人，唔公平。」始終Gloria曾是經典可愛女孩代表，難免在別人眼中有要求，但她不以為然，還笑言：「肥到似豬咁就梗係唔好啦，其實以前大家唔覺，我屁股一向咁大！我享受我嘅生活，做自己鍾意嘅嘢，如果潮流要瘦，咁我就係小眾，外國有節目教人要欣賞自己身體而唔係去改造自己，每個人有自己選擇，我選擇培養自己嘅內在。」
不愛娛圈生活
回想當年在娛樂圈的日子，Gloria坦言似發夢，因年紀細搞不清在做甚麼，只記得周遭的都是哥哥姐姐，難找朋友，最開心是可以周遊列國，學會獨立，談到經典瘀事，Gloria臉上重現童真並笑道：「洗腳水嘛，當年上台灣節目自我介紹時講十九歲講到變咗洗腳水，家啲國語好咗啲啦我覺得。」Gloria自覺性格比較直又不擅詞令，根本不適合在娛樂圈發展，02年曾復出多給自己一次機會，始終都是不喜歡，再次離開做自己喜歡做的事。