唔少人都有養小狗，但係每次帶狗狗去郊遊，搭親巴士都要偷偷摸摸，怕一旦俾司機發現咗，就冇得上車。噚日就有100位愛狗之人，光明正大咁帶住50隻愛犬，齊齊乘搭全港首部「99bus」，由尖沙嘴出發，經旺角、入大埔，最後到咗沙田彭福公園總站，開開心心去放狗。呢部開篷巴士，設有糞便收集箱，方便狗主喺旅途中清潔。佢哋將會喺今個月27日同11月中，再舉辦多次試搭「99bus」活動。主辦單位話，27號嗰場試搭經已滿額，希望舉辦完呢三次活動後，長遠可以爭取到寵物巴士服務，等有養寵物嘅市民，可以帶住小狗周圍去散心。