美國9月失業率跌至7.8%，唐牛睇到News pop-up都不禁「嘩」一聲，心諗係咪有造數成份（相信羅姆尼支持者都係咁諗），當然勞工部矢口否認有做手腳。無論如何，當地就業情況有復蘇勢頭，羅姆尼好難再以此攻擊，加上聯儲局早前推出QE3振興經濟，有埋伯南克幫手，如果奧巴馬咁都連任唔到，就只能承認過去4年政績未足以留住選民的心。
講番股市，恒指重上二萬一，磚頭股依然堅挺，今日繼續推介二線地產股香港興業（480）。集團乃大嶼山大地主，旗下愉景灣屬低密度豪宅，深受富戶歡迎，第14期津堤將於月內開售，預計呎價過萬，特色戶開價更會參考區內歷史呎價高位2.7萬元，有望成為再炒上嘅催化劑。現時興業仍持有愉景灣逾15萬呎商住樓面待售，定過抬油。今年3月底，興業每股NAV高達10.70元，較現價3.52元高逾兩倍，折讓過份。假設PB輕微收窄至0.4倍，可見4.28元，潛在升幅22%。
唐牛