無綫重頭劇《衝上雲霄II》已經拍得如火如荼，繼吳鎮宇之前鬧班助理編導（PA）後，噚日輪到好好先生張智霖（Chilam）亦向班PA發火喺微博狂鬧。噚日傍晚時份，Chilam氣冲冲話：「我熱烈懇求《衝上雲霄II》的PA同事們，你們另謀高就吧！雖說演戲乃是娛樂事業但事實上卻需要極認真去對待，亂七八糟的通告，狗屁不通的安排，這樣不單對演員不尊重……香港電視劇的沒落靠你們了！」
靚靚留言力撐
身為老婆嘅袁詠儀見到即安慰老公：「能把EQ超乎常人的張先生，氣得這樣，你們（PA）真的要打屁股了！」王喜、杜汶澤等都紛紛留言撐Chilam，其後他再寸班PA：「我突然頓悟該說對不起的人是我，我不該將標準定得高，是我罔顧了你們的水準了！對不起！」擺明話佢哋未夠班。
另外，前日下晝3點，Chilam約咗蔡一智同佢老婆及繼女，喺跑馬地一間茶餐廳食嘢。Chilam揸住架值300萬嘅啞黑色林寶堅尼Gallardo跑車現身，仲泊咗架車係茶記門口，唔少途人同架車影相，半粒鐘後Chilam先離開。