八方呢期成日開夜車睇歐聯分組賽，噚日就金精火眼，實一場香港人有份參與嘅世界級足球賽。八方講緊嘅係今屆移師墨西哥舉行嘅「無家者世界盃」，香港嘅曙光足球隊一班露宿者發奮圖強，操Fit自己走去參賽，首場賽事係對保加利亞，一開波嗰陣，曙光隊俾對手先攻入龍門，但好快就追成1比1平手。14分鐘上下半場賽事，都相當緊湊㗎，最後踢成4比5，曙光隊僅輸一球，比起過去幾屆比賽都算好大進步。開賽前一晚，有曙光隊成員話緊張到瞓唔着，要靠食杯麪減壓，有隊友即時溫馨提示，萬一食得多、食滯咗，會影響落場水準。曙光隊未來幾日仲有賽事，加油呀。