黃子華曾經喺棟篤笑講過師奶買股方程式：升，唔放；跌，唔放；幾時放，唔知！Samantha雖然引以為鑑，但曾反墮入另一套方程式：升，有糊食唔食罪大惡極；跌，散水喇嗱嗱聲放。股民同「上岸」最遙遠的距離，莫過於努力幫證券行打工。
這條炒股方程式，係每位初墮股海的股民必經過程，亦解釋到就算股市幾惡頂，銀行都會時刻提醒你同佢個蜜月期可以有幾長，何守信亦會用雙語音波功奮力Sell你。上周國慶冇A股阻住，H股生猛晒，市場憧憬十八大後有救市措施，內地證券股氣勢如虹。無他，救醒A股，挽救股民荷包都有助維穩。
上月底滬綜指失守2000大關，連日極速反彈4%。A股9月中開戶人數重上10萬戶，為兩個月以來首次，上半月入市買賣的散戶數目更大增32%。炒股首選龍頭中信証券（6030），走勢已突破6月以來的下降軌，早前主要股東批股套現近18億元，消除不明朗因素，短期穩陣博一成回報，睇16蚊。
Samantha
本欄逢周一、三、五刊出