皇家馬德里教練摩連奴前排話，如果要佢寫巴洛迪利嘅麻煩嘢，本書至少要200頁。我求大俠諗，如果曼城領隊文仙尼要將佢湊「巴神」嘅心得寫出嚟，分分鐘仲厚過百科全書㖭，因為上周六又有新嘢；「巴神」被換出場後，粒聲唔出，自己搭飛機返咗意大利。
上周六被換出後發脾氣
上周六曼城對新特蘭嘅英超聯賽，巴洛迪利踢正選，但表現低迷，所以文仙尼就喺55分鐘換佢走，換入阿古路。「巴神」換出場之後發晒脾氣，冇理過其他人，冇返去後備席坐，自己走番去更衣室。幾個鐘後，英國《每日郵報》仲影到「巴神」喺機場幫襯廉價航空公司，搭飛機返老家意大利。
私自離隊？好似似曾相識，上季泰維斯自己走咗返阿根廷，結果同文仙尼打咗半年冷戰，最後先至和解。不過，今次嘅主角係文仙尼契仔巴洛迪利，待遇就好唔同。文帥賽後淡化件事：「馬里奧（巴洛迪利）好努力，有入波嘅機會，佢踢咗一場好嘅比賽，但我認為佢可以仲好。」助教柏列亦話：「我唔知道佢直接走入球員通道嘅原因。嗰陣我哋領先1:0，好唔穩陣，所以要換人變陣，希望入多球。」曼城今仗最終3:0大勝新特蘭。