近期晉佳講咗唔少港股長線技術分析，之前講到10年期美債孳息率嘅9個月RSI出現底背馳，係資金開始流入股市、刺激港股出現大升浪嘅先兆。睇番恒指月線圖，同樣發現唔少利好訊號，只要10月份唔大跌，就確認月線MACD買入訊號；至於月線保歷加通道方面，只要指數今個月尾保持現水平，就會由下而上突破中軸。
過往20年，恒指試過4次出現月線圖MACD買入訊號，分別係1995年12月、1999年2月、2003年5月同2009年7月（見圖紅圈），之後都能夠維持升勢，仲喺一年內出現更高位。至於由下而上突破月線保歷加通道中軸，過去20年同樣出現4次，港股後市表現同樣理想。只要港股呢個月冇穿冇爛，確認後市利好，未來一年持有藍籌股理應穩賺，當然揀中強勢非指數股的話，回報會更加可觀。
中短線方面，恒指曾受制5月至今嘅上升通道頂部，不過經過大半個月嘅糾纏，似乎有醞釀突破阻力嘅能力，亦已慢慢消化3至4月喺20500至21500嘅蟹貨，本季有條件繼續向上。
上周五港股升勢趨向全面，好多二三線股都爆上，上升股份明顯多過下跌股份，市場氣氛升溫。至於揀股方面，油價有低位回升迹象，金價又似乎有力衝破每盎斯1800美元，似乎油金相關股可以成為新一輪強勢股，之前推介嘅天然氣設備及服務股，其實都係跟油股走，仲未開車嘅就有珠江鋼管（1938）。
珠管今季目標3.6元
珠管嘅產品種類，近年由陸上油管、海油管道、天然氣管道，擴大至電網同煤業用管道，原本嘅油氣行業需求已經勁，加埋新業務帶挈，嚟緊定單應該接到手軟，加上內地短期內料將公佈天然氣行業嘅「十二五」規劃，珠管勢將受惠，市賬率約1倍嘅國策受惠股，應該繼續有運行。
睇股價技術走勢，珠管由7月下旬低位1.69元，升到9月上旬嘅高位2.94元，足足爆升七成，最近一個月出現整固，但都只係橫行消化獲利盤，股價一直守住保歷加通道中軸，係強勢表現。博油價回升，佢短期內再開車，本季就可以睇3.60元，明顯跌穿9月低位2.68元則止蝕。
晉佳
本欄逢周一、三及五刊出