追看明星，未必要睇靚仔靚女？陳小春、林雪、小儀皆可獨當一面，證明只要有個性，便有市場。追看球隊，同樣未必個個鍾情長勝之師，只要有獨特個性，一樣有存在價值。
先看英超，遠的有「癲佬兵團」溫布頓，出名波並不是用腳踢，而是用頭頂和用身撞，竟可撞到街知巷聞，現在散了班，仍有人記得。近的有史篤城，靠一招手榴彈戰術，由戴納施展神奇臂力怒擲界外球，不單擲出名堂，更有姿勢有實際，讓這支中型班近年穩坐英超。再近一點，在香港，本季也出現了一支「港甲史篤城」──南區。
以地區隊身份升上甲組，南區班費得數百萬港元，陣中過半升班功臣只是業餘球員，早被認定是降班膽。但在首3場全敗後，返回主場香港仔運動場出戰，便發揮「地獄主場」優勢。憑場地較窄，加上中場陳卓光的強勁臂力，每每近中場便可將界外球擲入禁區造成混亂。兩仗直接間接「擲出」5個入球，搶得兩場和波。
據當地球迷透露，陳在乙組時曾將「手榴彈」直接擲入網！球證以為中間有人觸球更判入球有效！只見南區球迷每當己隊有界外球，便像碧咸射罰球一樣，當正叫糊般大叫加油，令每場逾800球迷high到爆。球隊要累積球迷，第一步當然要「有人識」，相信南區的手榴彈地獄主場已初步成功，期望他們主場對南華及傑志，一樣可炸出驚喜。
方柏翹
now足球評述員