鏞記酒家第二代掌舵人、董事總經理甘健成逝世，唔少同佢相熟嘅名人都覺得好可惜。鏞記屹立70年，係唔少中環人、政經名人嘅飯堂，除咗燒鵝、雲吞麪之外，鏞記原來有一啲熟客或者識食之人先識得叫嘅私房名菜。名人熟客仔就大力推薦「董事長腐乳」，同埋有錢都未必食到嘅「禮雲子炒飯」。
四樓專門招呼熟客仔
時裝設計師鄧達智同大哥甘健成、二哥甘琨禮相識逾廿年，鄧達智話，佢喺鏞記食過好多好特別嘅菜式，當中最深印象就係「董事長腐乳」。佢話「董事長腐乳」係鏞記一個退休老員工嘅拿手菜，每年限量供應，以前只會整畀創辦人甘穗煇食，偶然見到熟朋友先至攞少少出嚟畀大家品嚐。鄧達智話，好彩嘅話，鏞記都會畀佢打包少少返去畀媽媽試。
另一味好嘢「禮雲子炒飯」，就真係有錢都未必食到。因為「禮雲子」係一種叫「蟛蜞」嘅小蟹，家已經好少有，蟛蜞膏肥味鮮，散發嘅香氣比蝦膏、蝦醬仲要香濃，可以話全世界冇一個地方嘅餐廳，會用蟛蜞嘅膏嚟做菜式，得鏞記先有，仲要熟客先食到。玄學家麥玲玲都成日去鏞記開飯，佢同甘健成識咗10幾年，最鍾意食鏞記嘅「董事長腐乳」、炆柚皮。
普通客人去鏞記，一般只會喺一至三樓開餐，如果係熟客，就可以上到四樓，鄧達智就最鍾意上八樓嘅「嘗真」慢慢嘆，佢話八樓主要招呼一大班人聚會，同埋貴賓。八方聽聞，劉千石以前都係四樓常客。
mailto:[email protected]
