現聘有2000名員工的新紀元環保服務，其常務董事甄瑞嫻表示，該公司清潔工的時薪金由29元至40元不等，但高價亦未必請到人。
出得起人工都無人吼，呢份工一定唔易做！不過，甄瑞嫻認為，令女性不喜歡的崗位，原來並非惡臭公廁，亦非郊區的露天清潔工作，而是有冷氣的甲級商場。請唔到女清潔工原來與學歷無關，困難之處是要女工扮靚，真係估佢唔到。
逾萬人工冇人吼
甄瑞嫻透露，「甲級商場會要求清潔工塗口紅、化妝、紮頭髮、識微笑，要同人招呼……」所以清潔工「有錢都未必做，唔想畀人指指點點，要求多多壓力大」。
早於兩、三年前甲級商場圓方已出到高價10500元月薪，也請不到洗廁所工人；機場、航空公司出價成1.2萬元也可以請不到人。「有啲工著對拖鞋牛仔褲都得，連埋執紙皮賺一千幾百，合共都可以賺到7000蚊，又唔使受氣；有時仲可以偷時間返屋企煲湯，食午飯。」
她透露，寫字樓物業較多招聘師奶兼職，因為主要工作時間為下班時間後約下午5時至9時，工時較短，佔公司員工約10%。
高薪唔一定有人吼，錢少的工種兼屬於厭惡性，自然更無人吼，清潔工人職工會幹事施城威提到，清潔工本來已沒有太多人願意入行，尤其是港島區工作的清潔工，因此港島區不少清潔工的年齡高達65歲至80歲都有，「他們都在公廁工作，連中環滙豐對面嘅公廁，都係老伯伯駐守。」
行業員工呈老化
問及政府都會聘請80歲伯伯時，施城威說都是外判，政府判了出去，就不管細節。他續說，連80歲伯伯也要打工，除反映清潔行業難有新星外，亦反映退休後保障不足的問題。
對於如何留着員工，甄瑞嫻認為最重要留住員工的「心」，有時客戶的無理取鬧要為員工出頭，「一個人睇晒成個場，梗係做極都唔乾淨啦!」獲得客人讚賞，公司會給予500元獎金。懂得打人情牌，令她經營的公司有不少員工服務逾10年，流失率相對較少。