馬拉松賽事就嚟開始報名，一身Sporty架生實唔少得，可以邊跑邊聽音樂更係高層次享受！美國音響Bose首次聯乘Reebok推出運動型耳機，除咗聲靚包圍感特強，仲提供Sharp爆顏色，畀你襯番個Sporty Look！ 記者：陳國輝 攝影：譚盈傑 查詢：Bose（2123 9000）
防水透氣料 長跑好Feel
出過N咁多款AV產品嘅Bose，原來第一次推出運動型耳機SIE2及SIE2i。心諗：「掂唔掂㗎？」記招當日做咗個示範，佢先將一塊耳機用嘅特製纖維，對住吹一口氣，證明佢係透氣，然後又倒一杯水落去，但居然滴水不漏；證明咗呢款耳機除咗可以防水，透氣性仲好強，對跑友嚟講真係幾適合。
咁SIE2及SIE2i外形又有乜分別？其實SIE2只係純耳塞式耳機，至於SIE2i就加入連線遙控器及Mic，可當iPhone Handsfree咁用。音色上，佢就用番Bose好耍家嘅TriPort聲學技術，簡單講，即係能重現飽滿及均衡嘅音質，而整體包圍感強，聽住運動恍如置身另一個音樂世界，話唔定跑步特別好Feel㖭！
Airplay全屋四圍播
如果間屋有成千幾兩千呎，四、五間房，咁就要裝無線喇叭先滿足到你！Bose新返一款支援Airplay無線播放功能嘅SoundLink Air，外形由早前iPhone/iPod Dock音樂系統進化而成，可透過WiFi連接，無論客廳、睡房甚至廚房亦可各放一隻，手機當遙控，唔使四圍走。
一件頭音響攻電視
鍾意煲電影，又嫌5.1家庭組合喇叭線又多又複雜？話唔定呢款Bose Solo幫到手！佢專為提升電視音響、又喜歡「簡裝」嘅玩家而設，Solo提供一個20.7吋闊嘅平面位置，可畀你擺放最大約42吋嘅電視，機背仲有兩組低頻喇叭及光纖輸入，接駁勁Easy。
聲畫加大碼再戰AV
記得兩年前Bose推出嘅第一款VideoWave娛樂系統，成套喇叭內置於機身，唔止慳番好多空間，而且Surround效果超正，連大型前後級、5.1系統都唔使安裝！到第二代，繼續配置六組低音喇叭以及七單元揚聲器列陣，最大改善係Size加碼至46吋及55吋兩款，成套發燒級影音集於一部電視，部屋人士至Like！
