深水埗既殘且舊人多車擠，絕對應驗黃子華所說：呢區係用嚟懲罰懶人！
但世事無絕對，黑白對倒天天發生，既然天生一副趕客面容，不如練就一副好客性格，打出一招「平通港九」姿態，穩奪普羅大眾芳心。於是乎，不妨想像身處草根的北河街美食圈，在三分鐘路程之內，花了8,900元買支30年Macallan威士忌，再用三元買欖角蒸條油烏頭，甜品不如來個兩元的酥皮蛋撻吧！價錢如此分化，精神如此分裂，這就是北河精神─食得就食喇！ 記者：曾凡 攝影：伍慶泉
買得唔好嘥
這個美食圈以北河街市政大廈為中心點，井字形四條街分別是北河、桂林、基隆和大南街。站在街頭，舉頭望去，清一色舊式唐樓，密密麻麻的窗戶裏住着密密麻麻的草根階層，每遇到失意的朋友，我都會叫他/她去這區行吓，睇吓，感受吓，所有不快事情都會自動被清洗一空，好過去上生命勵志課程。每朝由七點至晚上七點，旺足十二小時，加埋晚上十點後的天光墟開檔，正式廿四小時無休，生命力就是如此被榨乾榨淨。
在這區的購物人潮之間，流傳着一句名言：「有買錯，無買貴」，雖有誇大成份，但絕對成立。尤其是與食有關的，繞着市政大廈走一圈，百幾檔生食熟食共冶一爐，還未計及街市內那一百幾十檔。於是，清晨，師奶阿婆麻甩老伯來買餸；中午，師奶阿婆麻甩老伯來午飯；下午，師奶阿婆麻甩老伯來嘆茶；黃昏，師奶阿婆麻甩老伯來買餸，生活騷天天上演。對喜愛老舖的人來說，這裏是個天堂，好些老舖幾十年來，人在變，貨在賣，就是環境裝修一成不變，就連櫃內那張單據，竟然一擺，便十年，真怕一碰便碎！
能來、會來，這區的人，都有一種尋寶的心態。那個寶，人各有異，有人是因為價錢，有人是因為氣氛，有人是因為懷舊，有人是因為食味，有人是因為雜亂，當然亦有人是因為以上各種因素。在逐漸消失的老區內，每個人都有自己的一張購物清單。
北河街 日晚兩種風景
像大數市政大廈一樣，這裏的二樓亦是熟食中心，歷史也近二十年，中心內十幾檔小店有粥粉麪飯有茶餐廳有點心舖，照顧區內食客，多年來也沒有大轉變。但當黃昏落幕後，其他店陸續收市，大利便開始版圖擴張，逐一在其他店前的桌椅擺放杯碟餐牌。六點，賓客開始出現，大小餐枱，逐一攻陷，七點未到，已然滿座，筵開百席，聲勢嚇人，拍得住Hyatt Ballroom。枱枱幾支大啤，人人顧住吹水，無人開飯嘅？原來這段飯前歡樂時光，讓勞動階層先來透透氣，吐吐苦，難怪啤酒妹妹穿梭全場，忙到停不了手，「呢度人人都隊啤，最勁一晚賣成千支架！」
講到食，招牌名菜應該不少，問大廚有甚麼好推介，「推咩介呀？做乜㗎你哋？採訪？頂，你嫌做我唔死呀？仲嚟採訪？」由於大廚不肯透露，老闆從中解圍，「燒鵝喇，我哋啲燒鵝好得㗎！有客特登由西貢出嚟食㗎！」仲有呢？「雞腳喇，豬手喇，枱枱都叫㗎！」這幾味，的確係枱枱叫，伴酒菜，誰不愛！至於各項小炒，老實說，不算突出，到底廚房空間有限，要碟碟出品精采，沒可能，但到底是鑊氣小炒，碟頭大，價錢平，與老友吹水聚舊吃喝一整，沒難度亦沒人催趕，已經值得捧場。
a.大利美食中心（2360 2808）
地址：北河街市政大廈2樓
越式滴漏在飄香
在熟食中心左邊最角落，有一間不起眼的越南小店芽莊城，菜牌上只有粉麪和小食選擇，摸上門的，十居其九跨區搵食，而且是年輕人居多，明顯是口碑載道。在「人人都是美食家」的年代，一家店的好壞，一個網絡平台足以搞垮或捧起一間店。「我呢度開咗成年，直至有雜誌報道，至有人知。」一傳十，網上食評又有不少試食報告，「有人講無用㗎，如果你啲嘢唔掂，係咪咁講？」看得穿，睇得透，果然誠意可加。
對於東南亞美食，我一直認為由本土人掌廚才會有原來味道。老闆關先生是越南華僑，這已經值得加分，看過其餐牌，粉類做主打，其中一味越式蝦膠扎肉番茄湯米粉可謂招牌作，湯底番茄味濃厚，蝦餅又彈牙，米粉又夠索味，相當好食，而且隨湯粉送上包括金不換、青檸和紅椒粒的調味品，跟足越南風味，魚露又是自製，處處見誠意。最令人期待的，還是那杯滴漏咖啡，放入兩羹越南咖啡粉，倒少少熱水讓其膨脹，再慢慢倒入熱水，讓其滴出一杯濃香咖啡，放少少煉奶，味道口感充滿亞洲風情。啊，忘了告訴你，這裏一碗細的粉加一杯滴漏，才$23，是不是有點過份？
b.芽莊城越南菜（2725 2338）
地址：北河街市政大廈2樓10號
老好醬料風味
「衰仔，落街買五毫子麪豉返嚟！」，「乜記，聽日送十斤米嚟，要上次嗰隻絲苗！」這些對話，年輕一輩沒聽過，年長一輩懷念過。時至今日，糧油雜貨店差不多被超市取代，款款獨立包裝乾淨得體，但就是欠缺了一份食物的情味。
走過泰興很易走漏眼，門口擺賣着雞蛋、蒜頭、老薑等暢銷品，反而走進去，一列醬料玻璃瓶才是焦點。店內清一色叔父輩店員，「要乜呀？」呢排醬料好似好正，「梗係，我哋自己做的。」呢幾種係乜醬？「呢隻係麪豉、柱侯，黑啲呢隻係古勞麪豉，古勞即係鶴山一個地方，出產既麪豉比一般濃郁好多㗎，用嚟蒸魚蒸肉最好食！」咁畀三蚊我。呢包又係乜呢？「茶瓜，拌飯食，以前啲人有句口頭禪：『茶瓜送飯，好人有限』！」咁好笑，乜解究？「以前啲人有病，無胃口，就用茶瓜來拌飯食，所以咪好人有限囉！」哈，果然old skool！店內所有醬料醃菜都在新界的調順醬園自製，這名字很明顯出自「風調雨順」，古人取名，還是意頭最重要。
若你在店內打爛沙盤問到篤，包你大有收穫，比如花生油哪出品最香最醇；米舖的米與超市的有甚麼分別等。以前的通識，變了今日的專業。你問，學來做乜？沒甚麼，生活本身就是一種學問。
c.泰興糧油雜貨店（2386 2568）
地址：北河街70號
三餸良心套餐
如果這間平價飯店不是被傳媒發掘，誰會知道老闆高佬明的故事？哪位女士會甘願忍受麻甩叔父們打雀眼光下吃鳳爪排骨飯？高佬明真是良心老闆，他每日免費派飯給窮人，又特意弄出幾十味小菜，以平到離譜的價錢照顧街坊。我最喜歡他的「窮人也要吃得好」論點，還要實際行動，全部用於餐廳出品之上，例如去菜欄買平貨、去元朗買盤底頭抽、堅持不用國產生粉、巨型雪房預購大量蔬菜，店裏一切，自己能做便自己做，能修便自己修。每逢中午和黃昏，門前永遠人頭湧湧，三個阿姐服侍成村人，一個要買三餸飯分開盒盛載，一個要蒸飯加西蘭花，一個要半邊白切雞加燒肉，一個接一個，手快腳快，無話甩拖。
d.北河燒臘飯店
地址：北河街50號地下
冰杯銀菊露
凉茶舖都有一種特有的味道，那不是藥味，而是閒適味。你可有見過人擠人的凉茶舖？沒有！這間東莞佬也一樣，淺綠色的牆壁已經夠懷舊，1948年已在深水埗設店，這裏的凉茶，聽說依足阿爺秘方，廿四味藥煲上寫的凉茶功效牌子，就是其筆迹。本人最愛是其銀菊露，淡淡的菊花茶香加上蜜糖的清潤，用經典飲冰杯盛載，有時炎炎夏日，走過都會因為那隻杯而停下來，再看着店中的風扇在轉，一轉眼，凉茶舖和人，都一齊老去了。
e.東莞佬凉茶
地址：北河街41號
威士忌重鎮
本來北河街這些老區最好賣應該係孖蒸三蒸，飲得起竹葉青都已經係對酒精有要求。老實講走入世光，全因櫥窗擺了幾支日本山崎威士忌。店內一邊賣藥一邊賣酒，舉目一看，品牌相當對路，既有Glenfiddich、Black Grouse、Balvenie、Glenrothes和日本Suntory的出品等，最矚目要算頂層那幾支木盒Macallan，Fine Oak Triple Cask的21和30年都有，接近萬元，珍貴非常。試問老闆不愛酒，顧客不懂酒，又怎會有此珍藏出現？
f.世光酒藥行（2386 9149）
地址：北河街90號
基隆街 兩元救條命
如果你在深水埗跌了兩元，記得執番，因為這兩元，夠買一個蛋撻，或者可以救回一條命。早前社會興講「良心店」，在基隆街的櫻桃麪包因$1.5一個雞尾包，於是惹來全城感謝，電視採訪。可惜物價始終越來越貴，現在的雞尾包，已經要$2，或者$3.5兩個，加得都算克制；而最抵食，仍然是蛋撻，之前$5有三個，現在$6三個，計起來才兩元一個，買一打才$24，還有酥皮和牛油皮之分，份量絕不失禮，日日賣成二十底，真正由早到晚個個鐘頭有撻出爐，難怪無時無刻來買都熱辣辣。
g.櫻桃麪飽西餅
地址：基隆街263號
粉麪歷史博物館
新德明，好明顯幾十年來沒有作過任何改動，抬頭看看那一手精緻的立體字招牌，還附有題字人的簽名，這種排場，明顯是大店所為。不過留意「德明」之前，用紅筆加了一個「新」字。現任老闆說，「呢間麪廠都有七十幾年歷史，我接手就幾年啫！」走進店內，一枱一椅一櫃，絕對肯定七十年前同一個模樣，「乜都無郁過！」無郁過便好了，直衝入店內做麪工場，那些打麪機器、焗爐蒸爐，全部幾十年歷史，難道沒壞過嗎？「壞了就自己整，好易㗎啫！」店裏出品，甚麼麪都有，蛋麪、蝦子麪、伊麪、上海麪、北京掛麪……都是不同師傅製作。師傅每日來一轉，做起即日所需，便離開，換另一個師傅上場，日日如是，「通常靚嘅麪我哋自己做，好似蝦子麪咁，花心機嘛，邊有人肯嚟幫你搞！」除了門市，附近食肆，好像信興茶樓，便是他們的長期客仔，至於來買粉麪多是街坊熟客，而且價錢便宜，蝦子麪一斤才六十元，「我都唔知人哋賣幾錢，總之我賣得唔貴就得喇！」一個上海麪才$4.5，份量之大，拌上葱油，可以分兩餐來吃，沒理由仲食即食麪啩！
h.新德明粉麪廠
地址：基隆街254號
老派糕點
深水埗好怪，有些店，未裝修過，彷彿一開始是這樣，就這樣。幾十年過去，外面事過境遷，這裏人面依舊。鴻發自1955年營業至今，每日凌晨四點已經開始製作糕點，也像店子一樣，多年不變。缽仔糕是用真正瓦製缽仔盛載，傳統的黃糖紅豆味道最好。至於另一馳名是鬆糕。鬆糕又叫鳳眼糕，因糕身有一個個大氣孔；有人又叫佢做豆泥糕，這裏用古法以黃糖漿蒸製，效果比白糖更甜。店裏長期陰暗，頗有國內餐廳特色，大家以為只供外賣，其實早上也供應粥品，用來配糕點一流。下午沒客人，店裏變身麻雀房，齊齊來打幾圈，這種家庭風味，才是幾十年老店所應該保留的優閒生活。
i.鴻發糕品（2386 1034）
地址：基隆街251號
基隆街 滑滑豬油腸粉
燒賣牛肉粉果炒粉麪甚麼都有，但最出名就係豬腸粉。事關腸粉工場就在店後，十幾年前同一舖位連堂座都沒有，也是日日排長龍。其腸粉真正好食，雖然蒸煮時間不夠，但勝在夠新鮮，軟糯之餘又夠滑溜。另一秘方是花生醬料加入了豬油，那種香味是其他所不能取代的，不過素食人士就要注意了。其他小吃，燒賣乒乓波咁大粒，內有菇粒，也算是腸粉外不錯的選擇。
j.合益泰小食（2720 0239）
地址：桂林街121號
永遠的蛋牛治
當酒樓的蒸牛肉球用的已經不是牛肉時，又或者大部份茶檔的蛋牛治都是罐頭出品時，新香園的蛋牛治仍然用新鮮牛炒香再落蛋漿來炒，已經可以與各方擁躉有個交代了，至於那片麪包，烘還是不烘，各有偏愛，不過一口咬下，蛋牛的汁液沾在軟腍的方包上那種合而為一的口感，又的確係幾好味道。近年物價飛升，尤其牛肉，貴得嚇人，不過對小店來說，打出名堂就要堅持，千萬咪偷工減料。除了蛋牛治，我反而欣賞他們凌晨時段的生滾粥，全部即叫即煲，尤其冬日，來一個生滾牛肉粥，加隻雞蛋，另一個蛋牛吃法，一樣咁正！
k.新香園（堅記）（2386 2748）
地址：桂林街38號A
水滾茶靚點心香
要數香港老牌茶樓信興一定份內有名，隨便在街上捉個人問，信興喺邊？大都知道，碰啱搵個上了年紀的叔父輩一問，還順帶講多句：「你搵信興做乜？我係忠實客仔」，飲茶囉，唔通去借電話咩！「兄弟，咪坐錯我個位喎！」我開始懷疑，信興不是一間茶樓，而是一個基地：晨早六點，熟客蒲頭，各自各冲壺靚茶，講明是茶樓，當然要水滾茶靚，有人喜歡濃，有人喜歡清，自己落手最實際，點籠點心，嘆報紙，有時你一言，我一語，鬧鬧政府，批評政黨，各有各擁躉，一坐，就是兩個鐘，天色漸亮，各人四散東西；到了午飯，又再聚頭，繼續未完話題，第二天，準時恭候。說是基地，就是這意思。
至於食物，傳統的豬肚燒賣、鴨腳扎等依然吃得到，也是茶樓師傅自家製作，朝朝四五點開工即做即蒸，用料不算講究，味道也不特別，卻吃得出那種傳統平民百姓的平實風味。點心還是推着車仔叫賣，老人家節儉，一碟鯪魚球加碗白飯，就是一餐，相比起附近茶餐廳，不是特別便宜，但有杯熱茶下肚，不如白開水般清淡，也是種實在的溫飽。
舊式茶樓都很注重茶葉質素，通常更會自設茶倉讓茶葉陳化，越陳，茶便越香濃。信興也不例外，茶倉就在樓上，茶葉朝朝溝，飲慣的人客，搬離此區，日思夜想，惟有買回家自己泡，聞着茶香，想念茶友天天高談闊論的日子。
l.信興酒樓（2386 8946）
地址︰桂林街95號A
老派冰室嘆件撻
華南冰室一直沒被大肆吹噓，不知是幸還是不幸，起碼想食件蛋糕飲杯茶走不用企門口等入座。開業三十幾年，冰室用以懷舊的室內裝修、卡位、吧枱等依然不變，舉起相機雖未至於驚喜處處，但那一堵以綠白防火板相隔的牆，叫做有個交代。周老闆說，他們的奶茶咖啡最香；茶水師傅話，佢企吧枱都十幾年喇，日冲百幾杯，永無失手㗎！食物方面，雖然茶餐組合永恒不變，叉燒意粉加炒蛋多士，但對很多人來說，店前的玻璃餅櫃仲有吸引力，合桃蛋糕、 椰撻、蝴蝶酥等等，西式糕點老情懷，只有舊派冰室還有保留。從來英國人的下午茶，就是一杯茶一件餅而已，點會啪多碗餐蛋麪㗎！
m.華南冰室（2728 0182）
地址：桂林街87號
大南街 秘店焗飯最出色
餐廳開在深水埗比較偏僻的大南街尾近警署對面，附近又全是回收電器舖，行人路永遠堆滿二手電腦電視機，門前馬路又雙重泊滿貨車，非地膽，絕對不知這裏有間隱秘餐廳。開業差不多二十年，街坊生意為主，沒甚麼必殺技，只是用心把食物做好，比如熱賣的焗豬扒飯，豬扒仍然厚切，飯底炒得香，茄汁酸甜平衡，包湯包飲品才售五十多元；咖喱又是好吃的熱賣食物，點一味咖喱牛腩飯，汁與肉一吃便知是一起燜的，絕非汁肉分離那種濫竽充數貨色；晚上又有越南二人套餐，大頭蝦、春卷和原隻菠蘿炒飯等等，實實在在，食番餐好。
n.星河餐廳（2728 8371）
地址：大南街374號