最硬淨：韋斯咸
英超各隊上個禮拜六齊演入球騷，場場開「大」益鍾意睇入波嘅球迷；雷丁作客史雲斯領先兩球下開唔到齋，唔算太失望，各佔半場優勢。如賽前所料，兩軍中場輸送呢個環節做得唔好，尤其係用「南韓謝四」寄誠庸擔大旗嘅史雲斯，進攻略嫌迂迴，由佢去帶領呢支聯合國部隊，淨係語言唔通都已經幾死火，真係要俾啲時間佢哋練默契。雷丁硬橋硬馬，潛質一般，可唔可以護級成功言之尚早，但講硬淨，另一升班馬韋斯咸相信會令擁躉放心得多，反輸阿仙奴表現已好好，惜關鍵先生路蘭兩度失機，我唔太同意公仔廂評述員話佢哋班波打大會醒神，踢法恰唔到細會；大Sam教波實而不華，計硬淨、計有空中霸王安祖卡路爾配「黑雙翼」，好多細會肯定唔係佢哋嗰皮！
最戇居：布力般
炒人都要有後補方案，但係布力般嘅印度班主應該冇諗過點做好，上月尾輸咗畀米堡後，即刻要借勢逼走冇料領隊堅恩；近期搵副手頂住檔，球會近3戰再得2和1負，失7分，如果最後因為呢個小低潮升唔番班，呢次炒人行動都幾失敗。黑池同白禮頓，分別冇咗王牌恩斯仔同馬卡爾史密夫打正選後，近績即沉，大家值得存記。
最危險：大阪飛腳
上個禮拜六跑完馬，唔少人包括小弟肯定飛撲押注日聯6點場兩大戰，全季之前只贏過3場嘅札幌岡薩多，竟然以2:1揚威浦和紅鑽，爆出12.5倍巨冷W。紅鑽連對大魚腩都鯁親，今屆尚餘6場，9成以上肯定封王無望。爭霸呢家嘢，今屆唔得可以等下屆，但另一傳統勁旅大阪飛腳喺呢個國際賽小休期，為保命肯定震過貓王；之前佢哋回勇5球大炒紅鑽，但之後兩仗連埋上星期六敗走仙台維加泰，共失5分，跌至尾2，下場聯賽作客未坐穩船嘅川崎前鋒，唔樂觀！
最老定：銀河、紅牛
美職聯大名牌紐約紅牛同洛杉磯銀河，盡出碧咸、亨利同羅比堅尼等大球星，仲踢足全場，但好罕有咁喺上星期六分別主場輸波，睇陣容買波者呢鋪又中招；查實佢哋兩隊已肯定出線季後賽，蠱惑的波在所難免，波友都係小心行事，捧得過熱不宜。
最醒神：聖保羅
聖保羅喺另一傳統大會山度士簽得中場好手甘素後，近4場聯賽得3捷，上到第5，擺明車馬擴軍要搶前4踢自由盃。巴甲喺呢個國際賽假期成足智彩主打，球迷有興趣不妨多刨軍情；但〈賽後筆記〉下周會暫停，10月23日再同大家馬後炮。