23歲，鄧家怡，科大會計系畢業，以實踐「夢不只是想」為己任，畢業後不做會計師，膽粗粗創辦《Dreammag》雙月刊，鼓勵年輕人追夢。外行人辦冷門雜誌大受歡迎，還因對「夢想」的執迷，感動到在商界打滾多年的中小企受訪者，打本百萬讓她實踐美夢，開設首間以夢想為主題的概念咖啡店，聘用聾人做侍應，邀請食客在名信片寫上祝福語，送給陌生人。親身示範「夢不只是想」，只要勇敢行出第一步，原來真的會成真！
記者：呂麗嬋
「成日講夢想，你屋企好有錢㗎？呢個問題，我成日畀人問。夢想其實唔係好貴，最緊要，係你會唔會行出第一步。我嘅父母唔係李嘉誠，自己係大女，對下仲有三個細佬妹，要畀家用。所以，父母都會日哦夜哦，問我點解唔做會計師；佢哋話，夜晚派糖水、飯盒畀露宿者，可以退咗休先做，搵份正職，公餘做咪得囉。
咁講，其實無錯。但我成日諗，點解要花人生大部份時間，做唔喜歡嘅工作，然後賺錢去做真正喜歡嘅嘢？所以，一畢業，我就決定唔做會計師，喺社福機構兼職，又籌備出版刊物。自細，我就好鍾意聽故事，聽到好聽又勵志嘅，總想同人分享，逐個講，好攰，透過本雜誌講，起碼睇嘅人多啲，仲可以慳番啖氣！
受訪者資助圓夢
只係，我讀會計出身，寫嘢唔叻，啱啱畢業，又無錢，咁點算？義工隊喺街派飯、兼職做公關，練成厚面皮，膽粗粗四出搵企業贊助，捐八百蚊，就可以得到雜誌專訪。呢間咖啡店嘅主要投資者，都係因為咁認識。我最記得，訪問時老闆娘問我：你問我咁多夢想嘅嘢，咁你自己又有乜嘢夢想？
我話，我嘅夢想就係開一間咖啡店。殊不知，好心嘅老闆娘竟然記在心上，報道出街後，佢問我：有無興趣實踐夢想？真係受寵若驚！結果連老闆娘嘅丈夫都拖埋落水。大家都無搞飲食嘅經驗，由籌備搵舖到營運，摸着石頭過河，唯有邊學邊做。
譬如食物定價，我希望平啲，但維唔到皮；又例如聘用聾人侍應，點菜有困難，要通宵將手寫菜譜加上編號……問題接踵出現，壓力好大，但我仍然好開心，夢想，要實踐先有生命，當初，我唔係行出第一步，都唔會夢想成真，係咪？」