邱淑貞（豆斗）嫁咗畀I.T老闆沈嘉偉之後息影，仲生咗三個女，現年44歲嘅豆斗一直同沈嘉偉非常恩愛，前晚沈嘉偉就帶埋豆斗同兩個女沈月、沈日去港島區開大餐享受天倫樂。
幫襯平民食肆
沈嘉偉嘅時裝生意越做越大，佢身家雖然豐厚，但一家人生活好簡單，開飯亦唔一定揀高級餐廳。前晚7點幾，見沈嘉偉揸住架黑色平治旅行車，載住豆斗同兩個女，先去上環明星食府、尚興潮洲食店買外賣，見老公買咗兩大袋外賣返上車，豆斗即開車門幫老公拎嘢，兩公婆睇嚟好合拍。
之後沈嘉偉又駛咗去香港仔市中心，今次就揀咗啲平民食肆，沈嘉偉先去太興燒味落單，轉頭又去附近嘅元氣壽司店買咗兩大袋外賣。沈嘉偉攞外賣返上車時，開咗後座車門放上車。前晚全程由沈嘉偉負責買嘢食，三母女十足皇后公主唔使操勞。買完各款美食，佢哋就開車駛去鴨脷洲利興街一棟商業大廈內開餐。
採訪、攝影：朱志聰、羅德光
