十月一日寫「跑步聖經」，提及陳啟明教授等人編撰嘅兩本新書《健康跑步樂》與《健康游泳樂》，中貿林睇完就在午飯後去書局「搜購」，但遍尋不獲，問左丁山去邊度買得到？真係唔知，呢類小書並非大出版社/大書局出版，有時係難在市面搵到嘅。
又有一位熱心讀者來郵，引述一位Zhang教授之言，指長期跑步對腎臟有不良影響，而美國一位主張緩步跑嘅專家就在五十歲時因心臟病而死，問左丁山有冇回應，左丁山又係唔識，最多他日再撞到陳啟明教授，向佢請教此問題。藝術B來電話：「乜買鞋要在下午買嘅咩，下午對腳會大啲㗎？真唔真呀？」真啩，教授們唔會講錯嘅。
我地對呢類日常生活之微細處，其實有好多嘢唔識，譬如左丁山每每在下午四五點寫稿，有時寫得幾辛苦，不知從那處落筆。十月四日嘅《華爾街日報》居然就有一篇特稿講一個人應該配合「人體時鐘」（Body Clock）工作，特別有效率，兼且減少受傷機會。
《華爾街日報》引用美國不同大學，不同心理學家，不同人體專家嘅研究結果，做一個撮要，甚有參考價值。原來在創作與啟發性思考方面，晚上九時後，人體逐漸疲倦，大腦最為開放，靈感時間到了！呢個時候就係最佳創作時期（大家明啦，記者、編輯，好多廣告創作人都係在九時後先至識做嘢嘅！）其他時間又點呀，嗱，有個時間表：
（一）早上起床後，寫電郵、寫微博；（二）早上九時精力充沛能處理難題，宜下困難決定，例如炒下屬魷魚；（三）早上十點，人體溫度上升，記憶力及集中力最好，宜閱讀文件、報告；（四）下午二時吃午飯後，最好小休片刻，瞌吓眼瞓；（五）下午四點，眼與手最為配合，宜做勞動工作，例如髹漆、手作工夫；（六）下午五時，肌肉力量與靈活性到達高峯，下場踢波、打壁球之類活動最好，不易受傷，英超球賽多在下午舉行，原來有道理。呢張時間表，唔知有冇人可以照足嚟做，做老闆或者可以得嘅，打工仔在午飯後小睡？你估係三十幾年前嘅大陸咩！左丁山係自由工作者，可以講少少秘密，每日中午時份瞌一瞌，成日都精神。