【寶雲道一帶】
現年32歲嘅容祖兒同大4歲嘅劉浩龍（師兄）今年6月公開拍拖，祖兒成功撇甩同性密友何韻詩，三人行變甜蜜二人世界。佢哋前日仲世紀拖手拍拖行山，大晒幸福。
「祖師戀」剛見光，祖兒伯樂、英皇老闆楊受成就揶揄師兄過早張揚戀事嘅行為鹵莽兼笨拙，言語間又懷疑有人嘅行動暗藏機心，總之就係唔睇好。不過祖兒都三張幾嘢，當然有權去爭取自己嘅幸福，為咗可以早日脫離剩女行列，佢好緊張同師兄遲來嘅感情，佢哋明知外間唔睇好，索性避談玩低調。
赴阿智囝囝百日宴
師兄早前為拍王維基電視台劇集而增肥20磅，頓變「肥龍」嘅佢，噚日被本報率先踢爆佢同祖兒前日拍拖去寶雲道行山，大拜姻緣石祈福，雖然相中見到佢哋只係肩並肩，似怕俾途人撞破。不過好戲在後頭，原來佢哋沿途見到路上冇乜人嗰陣，都情不自禁十指緊扣，兩人都風騷fing住行，尤其祖兒仲行到彈吓彈吓咁，睇嚟師兄真係冧爆佢；原來祖兒下晝同男友拖完手，夜晚換咗套飲衫，去咗蔡一智囝囝嘅百日宴，不過髮型就冇轉過，就咁俾一頭紫髮出賣咗，同拍拖行山嗰時一模一樣。
撰文：丁寧
