【CY百日】
【本報訊】「大話精，梁振英！」上任一百日，全港人對梁振英的「花朵」琅琅上口，人們聽到梁說買豉油，會猜他是買麪包，說「唔記得」等於「身有屎」，說「等我返去了解吓」意思是「不了了之」，無建花槽因為建了花棚，撤回和不撤回之間，就是大話精的游弋空間。被一眾學者讚揚語言能力極高的梁振英，機關算盡太聰明，上任以來語言「偽術」本色盡顯，卻「贏了場交，輸了個家」，一手摧毀官民互信，令施政舉步維艱。
記者：張嘉雯、白琳
張堅庭寄語：
少啲聰明，多啲人性
曾經為梁家傑及唐英年兩位特首候選人提供口才特訓的張堅庭認為，梁振英的語言能力在董曾二人之上，「講嘢好有條理，聲線呀、高度呀好好，但自從花棚同花槽嘅爭議開始，啲人就開始覺得佢講假話、有機心」。他認為，梁振英應學習唐英年，「少啲聰明，多啲人性」。
僭建事件揭狡猾面
中央政策組前全職顧問劉細良，亦讚揚梁振英的說話技巧高，「講嘢比較流暢，任何時間問佢同一樣嘢，佢嘅key message（主要訊息）都一樣，唔會好spontaneous（自然隨便）咁去答，令人好快記得佢要講嘅嘢」。
不過豪宅僭建事件，完全暴露了梁振英的狡猾，「鄭家富問佢花槽，佢話冇講過花槽，耍走咗個問題，口舌上佔咗上風，但輸咗誠信」。到新界東北發展計劃，因為民意反彈，又把深港融合說成是房屋政策，「連龍門都轉埋，遮得前面嚟，又打出個籮柚，啲人更加唔信你……佢講嘢叻，以前係credit（信譽），家係負債，以前like，家變咗dislike；啲人覺得，你梗係講假話，一定有hidden agenda（隱藏的動機）」。
誠懇表情蒙蔽大眾
最早批評梁振英「語言的偽術」、中文大學政治與行政學系高級講師蔡子強認為，梁振英有演藝天份，比曾蔭權高班，大眾最初會被他的表情蒙蔽，「曾蔭權俾成班記者圍，話佢貪小便宜，佢由衷地表現到好不屑，令你好憎佢，但你唔會俾佢呃；但梁振英會用好誠懇嘅表情、好誠懇嘅態度、好誠懇嘅語氣，嚟講廢話打發媒體」。
這種「手勢」，更蔓延到整個梁班子，羅范椒芬可以說出梁「潛意識以為屋企冇花棚」，問她本人會否加入梁班子，「她只會講conditional statement（假設性陳述），永遠唔會斬釘截鐵」。到發展局局長陳茂波爆出劏房事件，可以說「全不知情」；及至國民教育開展委員會主席胡紅玉，也只說國民教育指引「失效」，而不說撤回。
蔡子強直言，梁班子已耗盡了公眾的信任和耐性，「大家開始要求好斬釘截鐵嘅答案，唔好用你嘅language，要用我哋聽得明嘅language」。梁振英的出現，象徵官民互信的時代終結，對制度造成極大遺害，「啲人覺得董建華庸碌、曾蔭權貪小便宜，但都唔及梁振英，令人覺得政治人物信唔過」。
蔡子強相信，梁振英未來施政極為困難，「佢哋情願個社會寸步難行，都唔想向罪惡發展，大家都唔想同你合作。政改點可以同呢個人傾？佢會跣你㗎喎」。
只發鱔稿損新聞自由
今年2月，「本人定當捍衞新聞自由」，還在競選特首的梁振英出席記協的座談會時，揮筆簽下《新聞自由約章》。但梁班子甫上任，即向新聞自由施祿山之爪。記協主席麥燕庭批評，政府過去百日不斷打壓新聞自由，官媒的鱔稿和鱔片急增，拒絕公開採訪的理由又是語言偽術：這是「官員活動」並非「官式活動」；官員只是「探訪」，不是「落區」……麥批評梁班子熱衷做騷卻不敢面對傳媒監察，「又要威又要戴頭盔」，最終損害公眾知情權。
以車多為由迴避傳媒
7月至8月中，記協錄得政府鱔稿與鱔片數量達24項，林鄭月娥佔九項，梁振英佔七項，理應公開採訪的活動卻只安排「聯合採訪」，即邀請一至兩間傳媒攝錄，「梁振英去巴士站睇長者兩蚊搭車優惠、巡天橋話要起電梯，都冇通知全行，理由係巴士站多車、天橋危險」。麥質疑政府經常「博懵」迴避傳媒監察，「點解用公帑起電梯，唔做其他嘢？記者冇機會問，公眾唔知呢個政策點嚟」。
拒公佈海難死者名單
教育局局長吳克儉在國民教育科的敏感時刻秘密訪京，遭公眾非議。其後林鄭訪京雖有通知記者，卻訂不合理規矩，「事先講明唔准問嘢，新聞官仲恐嚇記者，如果唔聽話，下次唔畀你做，好離譜」。
政府又以深夜發稿或一天內接連宣佈多項重要政策，企圖掩沒負面消息，「陳茂波23:59發稿回應劏房指摘，好多記者唔會忘記」。
10.1海難死傷者眾，政府破天荒以私隱為由不公佈整份死者名單，麥憂慮立下壞先例，「今次政府個數同港燈唔同，日後會唔會好似大陸，連災難死傷數字都係假，出現官方版本同民間版本」。梁振英參選時簽署記協的《新聞自由約章》，承諾制訂資訊自由法，麥要求他盡快實踐承諾。
中大新聞與傳播學院副教授李立峯認為，政府企圖管理傳媒，中外皆有，「問題只係做得好唔好睇，會唔會弄巧反拙。美國總統選舉，都會用盡方法manipulate（操控）個media（傳媒），但要適可而止，唔好令巿民覺得政府玩緊佢」。
奉命整頓港台或撤換高層
整頓港台是梁振英四大政治任務之一，不少港台員工對此感到憂慮，該台《頭條新聞》主持人曾志豪估計，梁振英推國民教育弄致焦頭爛額，相信短期內無暇向港台「下手」。他表示，港台非商營機構，難以透過傳統入股的方式作出控制，相信撤換高層人員的可能性較大。工會表明會對梁班子提高警覺。
曾志豪表示，梁上任時間尚短，暫未見任何干預港台的動作，「佢四大任務開展得非常不順利，處理香港同大陸嘅問題會緊張啲，未必呢一屆對港台郁手」。
第三把手全屬公務員
他認為，梁最有可能採用的方法更換港台管理層，「如果你話換《鏗鏘集》、《頭條》監製，太明目張膽，會引起反彈，但家啲高層陸續退休，電台嘅第三把手都係政府公務員團隊調過嚟，咁調任係咪變咗常規呢？戴健文退休之後，會唔會港台三巨頭都係公務員團體嘅人」。
他相信，梁振英比過往的特首更需要一個對其有利的傳媒，令控制港台變得迫切，「政權一轉咗人之後，好多傳媒機構唔係好似以前咁好使，佢想要嘅唔係大公文匯，硬銷寫完無人理嗰種，而係好似以前某啲中產報紙咁，會軟性sell（推銷）佢」。
香港電台工會主席麥麗貞承認對「四大任務」的說法感憂慮，「國民教育已經開展緊，我哋都會擔心係唔係真係呢？我都會堅守自己崗位，提高警覺」。
建制派大撕裂傳媒急歸邊
香港這片小土地，在3月25日後變身成為戰場，傳媒立場也隨建制派大撕裂而再度洗牌。有新聞學者認為，梁振英上任後，民意壁壘分明，社會演變成兩極化，加上政權介入越來越深，傳媒的持平客觀態度已經再難有巿場。
浸會大學新聞系助理教授杜耀明認為，梁振英上任後，傳媒「歸邊」的情況越見明顯，原因是梁政府施政爭議性高，民意上壁壘分明，傳媒「好難騎牆」，「除咗傳統左派報章完全支持政府施政之外，某大集團都完全企喺特首嗰邊，反而《星島》以前成日企喺特區政府嗰邊，家因為建制派都有分派，所以有時都會間中加入監察政府嘅行列」 。
自我審查越來越赤裸
中文大學新聞與傳播學院副教授李立峯指，傳媒歸邊的情況過去一年比較明顯，「以前自我審查，要睇得好仔細先睇到，好subtle（細微），但進入咗特首選舉，《成報》可以改咗夫子篇文章，好赤裸，好似《南華早報》咁，外籍記者send email問老總李旺陽單新聞，佢可以答：『你明㗎啦，你唔鍾意咪辭職囉』」。
副教授李立峯認為，傳媒歸邊與整個社會的轉變有密切關係，「政權介入越嚟越直接同深，個社會越來越兩極化，公信力對報紙商業利益嘅好處，可能已經唔存在，與其兩邊都唔討好，惟有透過有意見有態度嚟appeal（迎合）公眾」。
狼英部份語言偽術
【博大霧語錄】
唔記得、唔知道、唔明白、冇印象
場景：立法會聆訊西九漏報利益
分析：沒有實質內容，拖延時間
【捉字蝨語錄】
剛才鄭家富議員提到嘅嗰個「花槽」，嗰個表述上亦都有啲問題，喺成件事裏面從來冇出現過「花槽」呢兩個字
場景：立法會答問大會
分析：捉字蝨、耍走問題
【留退路語錄】
撤回與唔撤回之間有好大空間
場景：國民教育爭議，大聯盟佔領政府總部
分析：為自己留退路，超出巿民期望
【泵波鐘語錄】
我買樓嘅時候係1999年，收樓嘅時候係2000年，12、13年前嘅事，我要返去了解一下
場景：記者詢問住所僭建事件
分析：拖延時間，他到現在仍未了解完
【玩語法語錄】
玻璃棚我承認係僭建嘅，我從來冇否認過玻璃棚由我建，我亦從來冇否認過當我知道佢係僭建物之後，有需要拆除；冇因為佢係玻璃棚或葡萄架，前身係木花棚，因此講呢個玻璃棚或者葡萄架唔係僭建物
場景：回應住所僭建事件
分析：雙重否定