橙天嘉禾（1132）打橫行咗一季，係時候。橙天2012年上半年度，純利飆升咗兩倍到4000萬銀。踏入下半年，有好似《蝙蝠俠》、《蜘蛛俠》等等好戲，加埋呢期祖國媒體報道，到下半年，祖國電影票房keep住好景，到9月底九個月，總票房應該達到125億人仔。橙天食住電影消費熱，繼續好靚仔。唔好估多，集團2012年度純利係咁意增長20%，到1.15億銀，預期PE得8倍幾單位數，比起好多同業吸引。再講，橙天呢幾年台灣業務，亦搞得有聲有色，而集團前排亦話，有意將呢瓣業務分拆上市。相信呢壇製作起動，橙天亦有多個熱炒賣點。呢轉吼住0.35元兜轉，橙天2012年度預期PE上番11倍，要見0.47元，潛在回報率34%，PE仲未追到同業水位。
保華有勢宜冷敲
保華建業（577）由上次話有意進軍電影業，經除權但最後計劃turn down咗兼無派特別息後，到家陣股價橫行大半年，現價0.50元，同08金融海嘯價差冇幾。而呢期所見，除磚頭股外，建築股好似新昌營造（404）及有利（406）都辣起埋。同類股有勢，冷敲保華，博升20%到0.60元，未有耐上到NAV 1.05元。錢雋