水能載舟，也能覆舟，抽水也是。抽水風氣正盛，在足球圈勁，在網絡上的足球圈更勁，原因？有嘢睇唔過眼、有冤冇路訴、有人唔抵得，又或者純粹有人想玩嘢。創造抽水理由不一而足，就如女士聚首，愛八卦是非一樣，男士吹水就自然會吹吹吓就抽，多少是天性。抽水這個詞的盛行，其實才這幾年的事，之前呢唔係冇，不過通常稱呼為整蠱、諷刺、笑人，合成起來就慢慢統一為抽水，呢味嘢之所以流行，除咗社會風氣之外，有人帶頭都好大影響，球壇的抽水王是誰？邊個又牙擦又多嘢講又有些少文化吖？係呀，抽水其實都要有些少文化學術根底㗎，兜個圈來話你喎，要動腦筋㗎，唔識用腦嘅，一句粗口爆出去算啦！係，抽水王呢我就實投票畀摩連奴先生嘞，前兩日網上流傳佢抽巴洛迪利水的小故事，佢話同巴神喺國米兩年裡面嘅笑話可以出一大本書，仲話試過有場波為咗提醒巴神喺下半場唔好再攞黃牌，所以半場休息嘅15分鐘剩係同佢一個人苦口婆心去教佢點樣冷靜，結果？下半場1分鐘巴洛迪利就立即攞牌被趕出場，呢段故事喺facebook傳到2萬9千幾個like，可見摩帥抽水講故事能力之高，而事實係巴神喺個場歐聯下半場頂咗半場先攞牌，唔係冇腦到一出場就中招。上一代的球壇抽水高人，當然要數馬勒當拿，佢嘅主要抽水對象，除咗每場嘅對手之外，就係天敵比利，話說有次記者問比利佢哋兩個邊位好波啲，比利話：「馬勒當拿剩係左腳識踢波，我就左右皆能，你話邊個勁啲！」老馬聽到之後就回應，「呢個問題好難答，不過我阿媽就話我好波啲嘞！」老馬難得一次抽得嚟有品。有人專抽水，又有人專被抽水，C朗就係最大苦主，佢被人網上抽嘅水加埋有成隊利物浦咁多。根據個人經驗，被抽水嘅最佳回應，唔係嬲，係鬥抽，甚至係抽番自己！當有日C朗chok少啲，仲識笑自己其實好鍾意睇跳水的話，肯定佢啲fans多過美斯。文：keyman電台電視體育主持mailto:[email protected]