「迷雲黨」一詞起源於無綫，泛指一眾親陳志雲的藝人。隨着志雲大師離開無綫，迷雲黨似乎消失了一陣子。後來大師出任商台要職，迷雲黨又出現了，今次梁泰來（Terry）及其商台節目拍檔吳綺莉（Elaine）成為新寵，前者更因為一隻手錶，被標籤為新愛將，究竟這兩位新黨員與大師有甚麼淵源？
撰文：李珮洳
以下是梁泰來自己的預言：「我一早就預咗俾人咁講，當我知道《1圈圈》（商台節目）要開咁大個記招時，心諗死梗，一定俾人寫。」果然開咪個多月後，因為一隻與陳志雲的同款手錶，Terry成為了封面人物，他說：「一個男性、做記者，家仲要開埋咪，自己一早幫自己起埋條題啦，『群星拱照新寵』。聽到開記招，就知出事，點知最後出嚟係因為撞錶。」Terry說做記者時，因負責《志雲飯局》的訪問而認識陳生，對於入了迷雲黨，Terry笑言：「商台冇迷雲黨，都冇崔建邦同唐詩詠。不過當初都feel到，有同事覺得我係所謂嘅黃馬褂而有唔同眼光，所以我要用雙倍努力話畀大家知，事實唔係咁。」
唔怕講成龍
至於本來只於電視出現的吳綺莉，同被指是因志雲關係而有機會入商台做節目，她即解釋說：「其實我朋友同陳生熟，我冇黨冇派，只係一個女人仔打份工，同埋今次係Terry聯絡我。」由於返工時間一流，完全配合到照顧女兒的時間，Elaine很快就答應主持《1圈圈》，她說：「好開心有機會試到新工作，最好嘅係佢哋好細心，遷就我等我可以放工湊女，而且有機會喺陳生身上學到好多嘢，佢轉數真係好快，有時佢會突然喺直播室飄過，輕描淡寫放低兩句說話，佢真係好犀利。」《1圈圈》的內容主要是報道即日娛樂新聞，主持人少不免會加入己見，如當日報紙娛樂頭條主角是成龍，Elaine又會否避開？她爽快回答說：「唔會，點解要避？會照報，我係專業主持。家啲觀眾聽眾好唔同，唔想你畀啲虛偽反應佢哋，佢哋鍾意最真實嘅事，同埋我做得呢個節目，都預咗會有呢啲新聞。」隨着Elaine帶女兒回港發展，她每次有新工作時，都會被指撲水養女。聽到這四字，她笑住回應：「我搵錢係名正言順，如果撲水養女呢四個字會令人有興趣睇呢單新聞，我唔介意。我打工搵錢又唔係做壞事，我真係要養女，唔通60歲先去搵嘢做？」
邀志雲受訪
有指《1圈圈》的出現踢走了在商台主持節目多年的查小欣，Terry解釋說：「小欣姐係冇人取代到，今次係節目改革，絕對唔係踢走佢。」Elaine更笑言自己只是小角色，無能力踢走查小欣。既然已經被列為迷雲黨，Terry亦已利用這身份，邀請陳志雲受訪，Terry說：「陳生11月要再上庭，擔遮就留畀王喜，我同陳生講，第一個一定要接受《1圈圈》獨家訪問，不過佢聽完冇答我！」
難忘訪問馬天如
曾任雜誌娛樂記者的Terry有豐富採訪經驗，要開咪做主持，開始時一定感到困難，Terry說：「我做咗咁多訪問，最怕係嗰啲話接受你訪問，但當你嗰日打畀佢做phone in，就問乜都唔答，一係話唔可以講畀你聽，如果係咁當初就唔好答應受訪啦。」到目前為止，令Terry印象最深刻的，是與馬天如（狄娜兒子）的訪問，他說：「估唔到佢連變性過程都講晒，就連認識佢女友嘅情形都講我知，因為我印象中嘅佢好低調。」
