泛民同建制派幾乎就新一屆立法會擺位傾掂數，傾唔掂嗰啲，例如財委會主席等，咪由競逐連任嘅卿姐同自由黨張宇人投票定生死囉！但查實泛民主派家陣仲就一個擺位煩惱中，就係內務委員會副主席嘞。
民主黨李華明棄選後，究竟由邊個泛民接佢個內副位呢？有成三個泛民主派都有興趣㗎，包括公民黨湯家驊、工黨何秀蘭以及獨立泛民李國麟。呢個消息傳出後，建制派紛紛表態力撐李國麟接任，咁睇法，咪李國麟最有機？咁又未必。因為建制派嘅支持，往往係死亡之吻囉。
八方聽聞，噚日泛民開飯盒會期間，有人就提到，唔係建制派想要邊個就邊個喎，應該係泛民協調後推薦畀建制派囉，所以噚日會議最後嘅決定係：無決定，等卿姐、袋巾下星期同葉國謙講數後再定奪。