恭喜，恭喜！香港體操好手黃曉盈（Angel），喺倫奧創出嘅「黃曉盈Angel上法」（圖），終於可以打入體操史冊！佢喺8月倫奧平衡木比賽中，自創嘅「前胸翻轉體180度上法」，日前終獲國際體操聯會認可，喺嚟緊12月出嘅規則集入面，女子平衡木上法就會加咗「黃曉盈Angel」呢個名。
Angel話，今次比起自己前年奪世大銅牌更開心，將來更唔排除會再創新招式：「我自己讀fashion，好鍾意創作，今次呢個「上法」，係我同教練嘅創作，比前年攞世大銅牌意義更大；既然我做到第一個，以後更夠膽去做第二個。」25歲嘅Angel下個月中就會去福建參加亞錦賽，到時有可能參加平衡木，但就唔會用新上法，因為倫奧後訓練未上力，只會用平常心去參賽喎！
香港體操隊總教練潘鏡雄開心咁話：「今次倫奧有七個女子體操選手申請新嘅動作，只有3個獲認可，Angel係其中一個，亦係中國以外嘅亞洲女選手第一人。」