facebook專頁「我哋係香港人，唔係中國人」班網民聽晚8點喺政總搞悼念南丫海難集會，現場有默哀儀式，仲會向保安局致感謝狀，表揚英勇救人嘅紀律部隊。網民同場會譴責中新社「報道」內地救援船「救起」95個墮海傷者，不滿內地官媒侮辱香港救援人員，暫時fb有300人響應。
查實呢班網民十．一去中聯辦舉港英旗，一舉成名，辣㷫晒班土共；政協委員劉夢熊噚日喺專欄發火，建議入境處同內地當局「成全」佢哋，立即吊銷呢班人本特區護照同回鄉卡。
網民積極挑機，計劃下周向Dream Bear請願，要求佢快啲做嘢，因為佢哋根本唔稀罕中國國籍咁話。