香港雖然每年都會有電腦展，不過現時已成為掃貨的「特賣場」。想親身感受最新科技產品，每年舉行的Sony感謝祭就不能錯過，今年有唔少首次曝光的電子產品，焦點有期待已久的4K LCD電視，讓人親身感受超高清效果。
記者：許福合
攝影：潘志恆
模特兒：Jancy@PureModels
84吋巨芒有3D
高清畫質已經普及平民化，超高清的4K亦開始成軍，今次感謝祭Sony亦開始催谷4K畫質。現場展出了業界中最大吋數的84吋BRAVIA 4K LCD電視，要知4K的解像度係1080P的四倍，這款KD-84X9000使用的4K 3,840×2,160 LCD面板中，影片像素方面足已支援84吋的「大畫面」顯示，仲有埋3D顯示。參觀者多數都被如此巨芒吸引而來，尤其播放多段4K超高清影片，唔少參觀者都會專登行埋電視前，欣賞畫質有多滑淨。畫面有如實景之外，聲音亦係「嘭嘭」聲，兩側10 Unit Live Speaker的重低音及高音都係高水準，可媲美音響系統。不過由於4K攝錄機、播放器、影碟等尚處起步階段，所以離真正民用化尚有一段日子。
4K影院睇超高清
睇完4K電視，記得去側邊嘅「4K實現館」，其實是一個使用高達6米專業級大屏幕建立的4K影院，專門播放原檔4K的影片，有咁大畫面，影片播放時好容易會讓參觀者有置身現場的錯覺，入場必睇！另一個「沖繩3D水族館」，當中用上多部BRAVIA 3D電視組成電視牆，用來播放海洋生物的高清影片，進入其中就如去到水族館一樣。
TX手機贏相機
手機亦係今次感謝祭焦點，事關會場首次展出了1,300萬像素相機Xperia TX。機身只厚8.6mm，內置Android 4.04系統，除咗有4.6吋超高清屏幕，用來預覽相片，效果亦相當好。影片攝錄則支援1080P，能對應NFC的「One-Touch」功能，簡單地一觸即可將網絡分享到另一部Sony裝置，過程亦好簡單。現場展出除了常見的黑、白色機身外，更有搶眼的桃紅色。
新Tablet S扮遙控
Xperia系列除手機外，亦有新機Xperia Tablet S，是上代Tablet S的進化版，更輕更薄，只有8.8mm薄身，重量亦有570g。預載Android 4.0.3系統，9.4吋屏幕，鋁製機身，特別之處係加入IPX4生活防水設計，一般水濺都不用擔心。新增紅外線通用遙控器，可操作多個裝置外，內置巨集功能，一個按鍵就可執行多個指令。
試新版PS3
PlayStation亦有展出新版PS3主機，機身更輕更細，硬碟容量卻增加至250GB及500GB。木炭黑色版剛推出，現場機迷可以親身體驗這部新主機。雖然實際玩落與上代PS3無大分別，但現場展出多款遊戲新作，亦令機迷相當盡興。其中PSV《街頭霸王×鐵拳》，由原有43名角追加12名新角，玩法吸引。
花絮
Sony感謝祭2012
日期及時間：
10月6日 12:00-8:30pm
10月7日 12:00-5:00pm
地點：灣仔會議展覽中心1期3G展覽廳
費用：免費入場
查詢：Sony（2345 2966）