倫奧女子場地單車凱林賽銅牌得主李慧詩（Sarah）又再中港兩邊走，噚日專誠由廣州趕返香港，出席佢嘅倫奧紀念郵票發佈會。自從贏咗獎牌後，Sarah人氣急升，個人第一個電視廣告近日終於「出街」，榮升做女主角嘅Sarah仲大讚拍得好過癮。
郵票25日公開發售
郵政署為Sarah攞牌而發行嘅紀念郵票，將會喺10月25日公開發售。噚日發佈會除咗家姐到場支持，仲有過百位中小學生出席，見到「香港女車神」，個個都好興奮，爭住同佢影相，仲有學生要求同佢嚟過「愛的抱抱」，一向友善嘅Sarah當然冇拒絕。不過，一提到「十．一海難」，佢就好唔開心，好感慨咁話：「我成日覺得香港海上交通好安全，聽到之後好驚訝，亦有為死難者同傷者祈禱，同時都提醒自己要珍惜眼前人，亦要珍惜每一日，唔好因為瑣碎事而同屋企人、朋友爭執，要珍惜同佢哋相處嘅時刻。」
講番開心事，Sarah早前為一個蒸餾水品牌拍嘅平面同電視廣告，最近經已面世，呢輯廣告總共花咗兩日時間拍攝，Sarah話好享受拍攝過程，「拍硬照時開行風扇，要吹起啲頭髮，不過工作人員好好人，一啲都唔辛苦。」
蒸餾水廣告「男友」現身
呢個電視廣告喺YouTube已經有得睇（ http://www.YouTube.com/watch?v=UBx1BvbF_hU），條片上載一星期左右，累積點擊率達6 ,000。片入面主要講Sarah嘅個人成長經歷，好似喺牛頭角下邨長大，因為心中有堅定信念，即使訓練受傷遇到挫折都唔會放棄，內容非常勵志。其中一幕見到Sarah同男仔鬧交，兩人之後疑似分手，究竟佢係唔係Sarah嘅前度？Sarah好鬼馬咁話：「男仔當然係演員啦，我有冇前男朋友？唔知呢！」真鬼馬。
