威盡倫奧嘅英國跳水神童戴利，前日趁有時間，孖住班朋友喺澳洲打沙灘排球鬆一鬆。18歲仔嘅佢自信爆棚，以為自己生得靚仔做乜都會引死女，居然無厘頭跳舞，騎呢舉動搞到佢朋友都忍唔住偷笑。輪到打波嗰陣，戴利好博命去扣殺，可惜有心冇力，動作似耍緊太極玩乾坤大挪移多啲！為咗執番個尾彩，佢終於做番自己最耍家嗰樣，擺chok樣企定定晒朱古力肌，得咗。