十月一日晚上，小G與老公及家人正在吃晚飯，酒興正濃，想話飲多兩杯之際，G先生手機突然急鳴，一聽就知係公司來電；放假時候，公司來電，當然係急事，怎敢不聽，一聽就趕住起身，對小G講：「我要去瑪麗醫院，大件事」，隨即奪門而出，在街上搶咗部的士，仆到上車，坐定之後，先至打電話俾小G：「公司船俾人撞沉咗，快啲聽住收音機。」時維晚上九點前，幾十萬人在維港兩岸等緊睇煙花之際。小G之後要等到十月二日晚上近十二時，先至見到老公返到屋企，滿面倦容、愁容，眼都紅晒，做公關最怕遇到呢種慘事，何況死難者係自己同事㖭。南丫島榕樹灣對開海面之「海泰號」（港九小輪）撞沉港燈載員工船隻「南丫四號」一事，係幾十年來罕見海上慘劇，港燈員工及朋友歡歡喜喜上船，一心去睇煙花，料不到悲悲慘慘地回來，三十八人仲不幸死亡，對港燈上上下下係一個沉重大打擊，至於肇事原因，有待警方與海事處調測，不便亂咁猜測。大凡有呢類慘劇，各方面必須以人為本，首先搶救人命，次則慰問安撫死傷者家屬，呢兩件事弄妥後，先至輪到搜集資料發放，追查事發詳情及原因。今港燈立即第一時間宣佈發放二十萬元應急錢予死者家屬，李嘉誠基金會撥款三千萬元幫助遇難者家屬渡過困難時刻，社會福利署派心理專家做家屬輔導員，可以講，即時能做嘅已經做咗，其他事情咪跟住去處理囉。有一位工聯會直選議員，叫做王國興，大概叻唔切，十月二日凌晨就出來抽水叫囂，走去瑪麗醫院，索取死傷者名單，又開記者會，要港燈交代賠償，等工會跟進，當時兵荒馬亂，救人要緊，邊度有人得閒去理佢吖，連記者都唔多睬佢。肥仔K與朋友當時正在打麻將，睇到有線新聞報道，一眾雀友為之把鬼火，大駡王國興無恥，擺死難者上枱，為自己爭取政治本錢。以為肥仔K等人年少氣盛鬧議員啫，估唔到十月三日與一班賓架吃午飯，佢地個個住在港島，又係羣起大駡王國興醜陋，賓架C高呼：「記住佢個名，2016年叫所有人唔好投佢一票！」班80後與呢批50後竟然在意見上全無代溝，一齊大罵，可見王國興呢勻確係神憎鬼厭。