公民黨郭榮鏗（Dennis）喺法律界險勝建制派強勁對手王桂壎後，成功保住泛民主派嘅議席不失，實在值得慶賀。但原來選舉過咗成個月，一向低調嘅Dennis前晚先喺友人要求下，搞咗個簡單聚餐慶功。
聚餐前先默哀一分鐘
Dennis話呀，眼見本港十．一出現海難，一度諗過取消呢個慶功活動，但由於助手已經好難得咁約晒一班法律界支持者，所以決定繼續搞，但一切從簡；一班與會大狀喺香港會聚餐前，先為死者默哀一分鐘，同時搵咗位做過神父嘅律師，帶領全體成員為死難者祈禱。多名資深大律師例如民主黨元老李柱銘、公民黨余若薇同吳靄儀、陳景生等都有到場，可謂星光熠熠。其間李柱銘同吳靄儀仲向Dennis分享咗唔少做法律界議員嘅心得，令Dennis獲益良多。