會考獲28分的孫耀威，是當年學校的狀元，之後於中大以二級榮譽畢業，卻選擇了演藝為事業，在娛樂圈打滾19年，連處男紅館演唱會都要等足20年，明年才開紀念騷，去勻香港、日本、台灣、內地發展的老孫，自嘲是娛圈異類，不喜歡停留一處棲息，惟面對愛情卻忠貞不移，因女友陳美詩（Macy）甘願跟他有情飲水飽。
撰文：余燕儀
面對事業，鍾意刺激的孫耀威似一隻冇腳的雀仔，不肯停下來棲息；面對愛情，他可以將感情停駐在一個女人身上嗎？老孫淡定說：「我一直覺得可以，由初戀開始，每次拍拖都全情投入，覺得呢個女仔係將來老婆，但當然事與願違啦，到我慢慢長大，四年前係人生最大轉變，感情去到谷底，好似無論幾認真都好，都係失敗收場，自己對愛情好有憧憬，一直覺得真愛在明天，但幾年前會諗，自己係咪搵唔到真愛？」
回復初戀感覺
正當對愛情心灰意冷時，卻讓老孫在錯誤的時間遇上正確的人，他說：「Macy嘅出現畀我好大轉變，好似返去初戀感覺，我覺得同佢有情飲水飽都OK，有啲女仔每刻都計住，但Macy經歷好多祈禱先同我一齊，佢每日問上帝：『孫耀威係咪我真命天子？』我哋想開始好耐但冇開始，係上帝畀佢好大肯定，佢先義無反顧同我一齊，無論我幾唔開心，佢都好樂意同我分擔，好似細個拍拖咁，窮唔緊要，冇錢搭地鐵咪搭電車，佢唔會好似以前啲女朋友，因為我情人節忙到唔記得會嬲，佢自己都會唔記得，佢覺得大家最愛對方係最緊要。」
婚後以家為先
老孫對Macy愛無悔，將她視為愛情生命的No.1：「佢將我哋愛情擺第一位，畀我重生感覺，咁嘅愛情先係孫耀威嘅愛情，我哋一定會結婚先生仔，但我希望拖到女友生唔出嗰日之前先結婚，因為我有好多嘢想做。」
老孫續說：「如果生完仔，我諗自己會好似李克勤咁深閨，小朋友一定佔咗我生命絕大部份，所以必須諗清楚自己有冇時間，同埋係咪願意放下事業，我唔係要做最受歡迎男歌手、金雞獎男主角，我係娛樂圈游牧民族、異類，我唔甘心停喺一塊地，呢個係我演藝哲學，咁先令我有火做落去，否則唔會見到我笑容。」
滿腹大計攻影圈
新唱片是孫耀威在環球的最後一隻碟，會否續約仍在考慮中，他說：「家合約唔係睇條件，要賺錢唔會返香港，反而重視公司畀幾多自由度做音樂，如果要我做扯線公仔，就算畀好多錢都唔要。」
老孫將推出新碟《A Second Thought》，碟名可解作一秒，亦可解作第二次，是他對自我的警惕：「我係一個超級性急嘅人，好多時唔經大腦做決定，成日同自己講畀多一秒有第二個諗法，可能呢秒發脾氣，過一秒已經冇咁嬲，自己由細到大都臭脾氣，但越大越冇火。」
寫劇本執導
對於將來，老孫謂可能一、兩年先出廣東、國語碟，每年拍一部電影，他說：「嚟緊好多大計，我想嘗試寫劇本做導演，明年入行20年又想開騷，自己係好奇怪嘅人，往往一件事做到咁上下，其他人會如火如荼繼續去，但我突然間閃去做其他嘢，我19歲入樂壇，26歲唱片最好賣，就去咗日本發展事業，突然間又走去拍戲，拍到06年又返嚟，我唔可以綁死一個地方，本性需要超級刺激感。」
